1Шастир 14 - Ариун Библи 2013

Иерусалимд Давид бэхжив

¹ Тирийн хаан Хирамаас Давидад элч нарыг хуш мод, мужаан, чулуучдын хамт түүнд зориулан гэр бариулахаар илгээв.

² ЭЗЭН өөрийг нь Израилийн хаанаар өргөмжлөн Түүний ард түмэн Израилийн тусын тулд хаанчлалыг нь өндөрт өргөснийг Давид ухааран ойлгожээ.

³ Тэгээд Давид Иерусалимд өөр олон эхнэр авч, тэр бүр ч олон хөвгүүд, охид төрүүлэв.

⁴ Иерусалимд түүнд төрсөн хүүхдүүдийн нэрс нь Шаммуа, Шобаб, Натан, Соломон,

⁵ Ибхар, Елишуа, Елпелет,

⁶ Нога, Нефег, Иафиа,

⁷ Елишама, Беелиада, Елифелет нар юм.

Филистчүүдийг ялав

⁸ Давид хамаг Израилийн хаанаар тослогдсон гэдгийг филистчүүд сонсоод, филистчүүд бүгдээрээ Давидыг хайж ирэв. Давид үүнийг сонсоод тэдний эсрэг хөдлөв.

⁹ Филистчүүд хүрч ирээд Рефаимын хөндийг цөлмөж тонов.

¹⁰ Тэгэхэд Давид, Бурханаас —Филистчүүдийн эсрэг би хөдлөх үү? Та миний гарт тэднийг тушаах уу? гэж лавлан асуухад ЭЗЭН, Давидад —Явагтун! Филистчүүдийг чиний гарт Би заавал тушаана гэж айлдав.

¹¹ Тиймээс тэрээр Баал-перазимд ирж, тэнд тэднийг хиаруулав. Давид —Миний гараар Бурхан, дайснуудыг минь үерийн ус мэт зад татлаа гэв. Тиймээс тэр газар Баал-перазим гэж нэрлэгджээ.

¹² Тэд өөрсдийн бурхдаа тэнд орхин зугтаасанд Давид тушаал өгч тэднийг галд шатаав.

¹³ Филистчүүд дахин ирээд мөнөөх хөндийд дээрэм тонуул хийв.

¹⁴ Давид дахин Бурханаас лавлахад Бурхан түүнд —Чи тэдний явж очиж болохгүй. Тэдний араар тойрч, ялам модны төглийн өмнө тэднийг дайр.

¹⁵ Ялам модны төглийн дээгүүр алхах чимээг сонсмогц чи тулалдахаар гар. Учир нь Бурхан филистчүүдийн цэргийг цохихоор чиний өмнө гарсан байна гэлээ.

¹⁶ Давид, өөрт нь Бурханы тушаасан ёсоор үйлдэж, тэд Гибеоноос Гезерийг хүртэл Филистийн цэргийг бут цохив.

¹⁷ Ингээд Давидын алдар нэр бүх нутагт түгэн тархжээ. ЭЗЭН бүх үндэстний дээр Давидаас эмээх айдсыг авчрав.