1Коринт 4 - Ариун Библи 2013

Элч нарын үйлчлэл

¹ Биднийг Христийн зарц нар бөгөөд Бурханы нууцын нярвууд гэж тооц.

² Мөн итгэмжит байхыг нярвуудаас шаарддаг.

³ Та нараар эсвэл хүний шүүхээр шүүлгэх нь миний хувьд тун ялихгүй зүйл. Би өөрөө ч гэсэн өөрийгөө шүүдэггүй.

⁴ Өөрийнхөө эсрэг мэдэх юм надад байхгүй ч үүгээрээ би зөвтгөгдсөн юм биш. Харин намайг шүүгч нь Эзэн мөн.

⁵ Иймд цагаас өмнө, Эзэнийг иртэл юуг ч бүү шүүгтүн. Эзэн харанхуйд нуугдсан юмсыг гэрэлд гаргах бөгөөд зүрхний санааг илрүүлнэ. Тэгээд Бурханаас хүн бүрд магтаал ирэх болно.

⁶ Ах дүү нар аа, би эдгээрийг та нарын төлөө өөртөө болон Аполд хэрэгжүүлсэн нь та нар бичигдсэнээс хэтрэхгүй байхыг биднээс суралцаасай гэснийх юм. Тэгвэл та нар нэгийнхээ өмнөөс нөгөөгийнхөө эсрэг ихэрхэхгүй.

⁷ Үнэндээ хэн чамайг илүү гээв? Чи байгаагаа хүлээж аваагүй гэж үү? Үнэхээр хүлээж авсан юм бол аваагүй юм шиг чи юунд сайрхана вэ?

⁸ Та нар хэдийнээ бялхсан бөгөөд баян болжээ. Та нар бидэнгүйгээр хаад болж. Та нар үнэхээр хаад болсон байгаасай гэж би хичнээн их хүснэ вэ. Тэгвэл бид ч та нартай хамт хаанчилна шүү дээ!

⁹ Учир нь элч биднийг Бурхан үхэх ял ногдогсод мэт бүхний адаг болгосон гэж би боддог. Юу гэвээс бид ертөнцөд, тэнгэрэлч нарт ч, хүмүүст ч үзвэр болжээ.

¹⁰ Бид Христийн төлөө мулгуу аж. Харин та нар Христ дотор ухаалаг аж. Бид мөхөс, харин та нар хүчтэй. Та нар алдар хүндтэй, харин бид нэр хүндгүй.

¹¹ Энэ мөчийг хүртэл бид өлсөж, цангаж, нүцгэн ноорхой, нүдүүлж зодуулж, тэнэж,

¹² зүдэн зүтгэн ажиллаж, зүхэхэд нь ерөөж, хавчихад нь тэвчиж,

¹³ доромжлоход нь эелдэг хариулан, муучлахад нь аргадаж, бид өдгөөг хүртэл хорвоогийн хог, хамгийн шаар мэт болсон.

Эцэг ёсны сануулга

¹⁴ Би та нарыг ичээхийн тулд бус, харин өөрийн хайрт хүүхдүүдийн хувьд та нарт сануулахын тулд үүнийг бичлээ.

¹⁵ Учир нь та нар Христ дор тоо томшгүй сургагчидтай байлаа ч эцэг болох нь олонгүй. Учир нь би Христ Есүс дор сайнмэдээгээр та нарыг төрүүлсэн.

¹⁶ Тиймээс та нараас гуйя. Намайг дуурайгсад бай.

¹⁷ Үүний улмаас би Эзэн доторх миний хайрт, итгэлт хүү болох Тимотыг та нарт илгээв. Хаа сайгүй чуулган бүрд би хэрхэн сургадгийн адил Христ [Есүс] доторх замуудыг минь тэр та нарт сануулах болно.

¹⁸ Зарим чинь намайг та нар дээр очихгүй юм шиг ихэрхдэг.

¹⁹ Хэрэв Эзэн хүсвэл би та нар дээр удахгүй очиж, ихэрхэгчдийн үгийг бус, харин хүчийг мэдэх болно.

²⁰ Учир нь Бурханы хаанчлал ярианд бус, харин хүч дор байна.

²¹ Би та нар дээр ташууртай юу эсвэл хайр ба дөлгөөн сүнстэй очих уу? Та нар алийг нь хүснэ вэ?