Дуулал 61 - Ариун Библи 2004

Найрал дууны удирдаачид. Утсан хөгжим дээр. Давидын дуулал.

¹ Бурхан, миний хашхирахыг сонсооч. Миний залбиралд чих тавиач.

² Миний зүрх сэтгэл дарамтанд ороход газар дэлхийн хязгаараас би Таныг дууддаг. Надаас өндөр хадан тийш намайг хөтлөөч.

³ Учир нь Та миний хоргодох газар, Дайсны эсрэг бат бэх цамхаг байсаар ирсэн билээ.

⁴ Өөрийн майханд намайг мөнхөд суулгаач. Таны жигүүрийн дор намайг хоргодуулаач. Села

⁵ Бурхан, Та миний тангаргуудыг сонссон билээ. Та нэрээс тань эмээгчдийн өвийг надад өгсөн.

⁶ Та хааныг урт наслуулна. Тэрээр олон үеүдийн турш амьдарна.

⁷ Тэрээр Бурханы өмнө мөнхөд амьдрах болно. Түүнийг хамгаалуулахаар хайр энэрэл болон үнэнийг томилооч.

⁸ Тийнхүү өдөр өдрөөр өөрийн тангаргуудыг биелүүлэхийн тулд Би Таны нэрийг мөнхөд магтан дуулна.