Дуулал 148 - Ариун Библи 2004

¹ ЭЗЭНийг магтагтун! Тэнгэрүүдээс ЭЗЭНийг магтагтун! Түүнийг өндөрт магтагтун!

² Түүний бүх тэнгэр элч нар аа, Түүнийг магтагтун! Түүний бүх цэргүүд ээ, Түүнийг магтагтун!

³ Нар ба сар аа, Түүнийг магтагтун! Гэрэлт бүх одод оо, Түүнийг магтагтун!

⁴ Хамгийн дээд тэнгэрүүд болон Тэнгэрийн дээрх ус ч Түүнийг магтагтун!

⁵ Тэднээр ЭЗЭНий нэрийг магтуул. Учир нь Түүний тушааснаар тэд бүтээгдсэн билээ.

⁶ Тэр бас үүрд мөнхөд тэднийг байрлуулсан юм. Тэрээр хэзээ ч өнгөрөн одохгүй зарлигийг гаргасан юм.

⁷ Газар дээрээс ЭЗЭНийг магтагтун. Далайн амьтад болон далайн гүнүүд,

⁸ Гал ба мөндөр, цас ба үүлс, Түүний үгийг гүйцэтгэдэг шуурга салхи,

⁹ Уулс ба бүх толгод, Жимсний модод ба бүх хушнууд,

¹⁰ Араатан амьтад ба бүх мал сүргүүд, Мөлхөгчид ба жигүүртэн шувууд,

¹¹ Дэлхийн хаад ба бүх хүмүүс, Түшмэд ба дэлхийн бүх шүүгчид,

¹² Залуус ба онгон бүсгүйчүүд, Хөгшчүүл ба хүүхдүүд магтагтун.

¹³ Тэднээр ЭЗЭНий нэрийг магтуул. Учир нь Түүний нэр л ганцаараа эрхэм дээд билээ. Түүний сүр жавхлан газар ба тэнгэрийн дээгүүр байдаг.

¹⁴ Тэрээр Өөрийн хүмүүсийн төлөө эврийг өргөсөн. Энэ нь Түүний бүх бурханлаг хүмүүс, Түүнд ойр буй хүмүүс болох Израилийн хөвгүүдийн төлөөх магтаал болой. ЭЗЭНийг магтагтун!