Дуулал 113 - Ариун Библи 2004

¹ ЭЗЭНийг магтагтун! ЭЗЭНий зарц нар аа, магтагтун, ЭЗЭНий нэрийг магтагтун.

² Эдүгээгээс өнө мөнхөд ЭЗЭНий нэр магтагдах болтугай.

³ Нар мандахаас жаргах хүртэл ЭЗЭНий нэр магтагдаг.

⁴ ЭЗЭН бүх үндэстнүүдийн дээгүүр өндөр байдаг. Түүний сүр жавхлан ч тэнгэрүүдийн дээгүүр юм.

⁵ Бидний Бурхан ЭЗЭНтэй хэн нь адил байж, Өндөрт заларч,

⁶ Тэнгэр болоод газрыг үзэхээр Өөрийгөө даруу болгодог вэ?

⁷ Тэрээр ядуусыг шороо тоосноос өргөж, Гачигдагсдыг үнсэн овооноос өндийлгөдөг.

⁸ Энэ нь ноёдтой хамт, Өөрийн ард түмний ноёдтой хамт тэднийг байлгахын тулд юм.

⁹ Тэрээр хүүсэр эмэгтэйг Хүүхдүүдийн жаргалт эх болгон гэрт нь амьдруулдаг. ЭЗЭНийг магтагтун!