Zekaria 9 - The Holy Bible In Alur (Lur) Revised Orthography

Pokolembe wi Thek M’utiekogi

¹ Ewolembe mi lembe pa Yehova wi ng’om Hadrak, man Dameski bibedo kayom pare (kum wang’ dhanu man mi suru ceke mir Israel ni yo ba Yehova);

² man Hamath bende, ma ni i kieune; Turo ku Sidon, kum gi riek dit.

³ Man Turo gomo ire ka ma tek, man ecoko mola ma tar pamir utur, man mola ma kwar ma leng’ calu unzabu m’i gengi.

⁴ Nen, Rwoth biyake, man ebigoyo tego pare i nam; e ebiwang’ ku mac.

⁵ Ackelon binene, man lworo binege; Gaza bende, e can binege dit; man Ekron, kum genogen pare jubidwoko ni lewic; man ubimo binyothre kud i Gaza, man jubibedo i Ackelon ungo.

⁶ Man nyathi luk bijany i Acdod calu ubimo, man abithumo kuhaya mi Jufilisti woko.

⁷ Man abikabu rimo pare kud i dhoge, man ginmajudagu pare i kind lake: man ebibedo ni dong’ dhanu pi Mungu mwa; man ebibedo calu jabim i Yuda, man Ekron calu Jayebusi.

⁸ Man abiguro hema ng’et ot para kum njuru asikari, kara ng’atu moko kud ukadh kud i ie kadi udwog de; man ng’atu moko mbe ma lem pare ie tek ma bikadhu kud i kindgi kendo: kum kawono aneno ku wang’a.

Ubimo ma Bibimo wi Sayuni

⁹ Anyong’a negi dit, E nya Sayuni; koki, E nya Yerusalem: nen, ubimo peri bino i beng’i; en e pwe, man e won both; e mol, man eberingo ku wi kana, en e wi kana ma nyathi kana.

¹⁰ Man abithumo magali woko ku i Efraim, man riuni kud i Yerusalem; man atum mir ali bithumbre woko; e ebiyero kwiocwiny ni thek: man bim pare bibedo gambre kum nam cil kum nam, man ugambre kum Kulo cil i kajik mi ng’om.

Maram Jubidwoko Ko Sayuni

¹¹ Man piri bende, kum rimo mi lembariba peri awodho jukol peri kud i vur ma pi mbe i ie.

¹² Wulokru ba ka ma tek, wu jukol mi genogen: cil tinuni ayero nia abimio wang’ario iri.

¹³ Kum adio Yuda piny ira, apong’o atum kud Efraim; man abithubo woti, E Sayuni, kum woti, E Yunani, man abidwoki calu palamularu pa ng’atu ma tek.

¹⁴ Man Yehova binen i wigi; man athero pare biringo pami lukoth; man Rwoth Yehova bikudho agwara, man ebicidho ku wavuvu ma yor ariwa ma piny.

¹⁵ Yehova mir udul bikurogi; man gibicamu, gibinyono kidi mir atum de; e gibimadhu, man gibikok calu ni kum pigulok, man gibipong’ calu tabu, calu gund pemblam.

¹⁶ E Yehova Mungu migi bibodhogi i ceng’ maeca calu udul mi dhanu pare; kum gibibedo calu kidi mi jamkermiwic, ma juting’o malu wi ng’om pare.

¹⁷ Kum karamb dit mi bero pare, man karamb dit mi leng’ pare mire ma! cam bicweyo awobi, pigulok ke nyir.