Zekaria 8 - The Holy Bible In Alur (Lur) Revised Orthography

Jung’olo pi Yiko Yerusalem

¹ Man lembe pa Yehova mir udul ubino i bang’a, m’uwacu kumae,

² Yehova mir udul uwacu kumae: Ngiri nega pi Sayuni ku ngiri ma dit, man ngiri nega pire ku kwinyo ma dit.

³ Yehova wacu kumae: Adwogo Sayuni, man abibedo i kind Yerusalem: e jubilwong’o Yerusalem Adhura mi lemandha; man got pa Yehova mir udul kumae, Got ma leng’.

⁴ Yehova mir udul uwacu kumae: Fodi dhanu m’uti ku mon m’uti gibibedo i gengi mi Yerusalem, ku ba dhanu nzu ku musongolo i cinge kum giti hai.

⁵ E gengi mir adhurane bibedo pong’ kud awia ma co man ku nyir m’ubetuko i gengine.

⁶ Yehova mir udul uwacu kumae: Tek en e lembe mi wang’uic i wang’ dong’ dhanu maeni i ceng’ maeca, maku ebed ni wang’uic bende i wang’a? Yehova mir udul uwacu.

⁷ Yehova mir udul uwacu kumae: Nen, abibodho dhanu para kud i ng’om ma yo nyangu, man kud i ng’om ma yo reto;

⁸ man abikelogi, e gibibedo i kind Yerusalem; man gibibedo dhanu para, man abibedo Mungu migi, i lemandha man i bedopwe.

⁹ Yehova mir udul uwacu kumae: Dong’ cingwu bed tek, wun ma wuwinjo i ceng’ maeni lembe m’uai i dhu jubila ma ginuti i ceng’ ma juguro ie thepiny mi ot pa Yehova mir udul, en e hekalu, kara egombre.

¹⁰ Kum ka fodi ceng’ maeca kuwok ungo, sukulia mi dhanu mbe, kadok sukulia mi lim de; kadok kwiocwiny moko de mbe ni ng’atu m’ucidho woko kadi m’umondo, kum jakwor: kum aketho dhanu ceke ku ba dhanu nzu ng’atuman kum wadi.

¹¹ Ento kawono abibedo ni dong’ dhanu maeni calu i ceng’ ma kwong’a ngo, Yehova mir udul uwacu.

¹² Kum kodhi mi kwiocwiny bibedo nuti; ulok bicego nyinge, ng’om de bimio medrine, man polo bimio thoi migi: man abiketho dong’ dhanu maeni ucam pacu mi gin maeni ceke.

¹³ Man ebitimbre, nia, calu wubedo ni kwong’ i kind thek, E ot mi Yuda ku ot mir Israel, e abibodhowu kumeca, man wubibedo ni mugisa. Kud wulwor, ento dong’ cingwu bed tek.

¹⁴ Kum Yehova mir udul uwacu kumae: Calu ia pido nia atim rac i kumwu, ka kwaruwu nyayu kwinyo i ia, Yehova mir udul uwacu, man aloko cwinya ngo;

¹⁵ e kumeno ia pido kendo i ceng’ maeni atim ber ni Yerusalem, man ni ot mi Yuda: kud wulwor.

¹⁶ Maeni gin ma wubitimo: Wuwec lembe mandha ng’atuman ku wadi man ku wadi; wupok lembapoka mi lemandha ku kwiocwiny i dhugang’ mu:

¹⁷ man i ng’atu moko kud upor lembe rac kum wadi; man kud umar kwong’ mi ndra: kum gin maeni ceke en e gin m’adagu, Yehova wacu.

¹⁸ Man lembe pa Yehova mir udul ubino i bang’a, m’uwacu kumae,

¹⁹ Yehova mir udul uwacu kumae, Wekocam mi dwi mir ang’wende, man wekocam mir abije, man wekocam mir abirone, man wekocam mir apaje, bibedo ni anyong’a ku mutoro, man agba mir anyong’a ni ot mi Yuda; ka kumeno wumar lemandha ku kwiocwiny.

²⁰ Yehova mir udul uwacu kumae: Fodi ebitimbre, nia kodhidhanu bibino, ku dhanu m’ubedo i adhura dupa;

²¹ man dhanu m’ubedo i adhura acel gibicidho ba wadi, gibiwacu kumae, Dong’ wacidhu pio wakweyu ngisi ba Yehova, man wayenyu Yehova mir udul: abicidho bende.

²² Eyo, kodhidhanu man thek ma tek gibibino Yerusalem niyenyo Yehova mir udul, man nikwayu ngisi ba Yehova.

²³ Yehova mir udul uwacu kumae: I ceng’ maeca ebitimbre, nia co apar, kud i dhu thek ceke, gibimaku dhu kendi pa Jayahudi, gibiwacu kumae, Wabicidho wakudu, kum wa winjo nia Mungu ni kudu.