Zekaria 4 - The Holy Bible In Alur (Lur) Revised Orthography

Thetala ku Yendulam

¹ Man malaika ma waweco wakude ebino kendo, man ecewa, calu dhanu ma jucewo ku wang’ nindo.

² Man ewacu ira kumae, Ineno ang’o? Man awacu kumae, Aneno, man, nen, thethala mi mola ma kwar kwa, ku tabune i wie, ku thalane abiro i wie; man wendthalane abiro kubang’gi nzu, ma gini i wie;

³ man yendulam ario i vute, acel yo ku cing’ ma yor acwic ni tabune, mucelo ke yo ku cing’ ma yor acamne.

⁴ E aloko lembe man awacu ni malaika ma waweco wakude, awacu kumae, Maeni ang’o, rwoth para?

⁵ E malaika ma waweco wakude lund uloko ira lembe man ewacu ira kumae, Ing’eyo ngo nia maeni ang’o? Man awacu kumae, Ungo, rwoth para.

⁶ Elund eloko lembe ewacu ira, ewacu kumae, Maeni lembe pa Yehova ni Zerubabel, kumae, Ku kero ngo, kadi ku tego de ngo, ento ku Tipona, Yehova mir udul uwacu.

⁷ In i ng’a, E got ma diti? i wang’ Zerubabel ibidoko ni poga: man ebiwodho kidi ma malu woko ku kok ire mi Bero, bero.

⁸ Man ke lembe pa Yehova bino i bang’a, m’uwacu kumae,

⁹ Cing’ Zerubabel uketho thepiny mi ot maeni; cinge bende bidare; man ibing’eyo nia Yehova mir udul uora i beng’wu.

¹⁰ Kum ng’a ma cayu ceng’ mi gin ma noki? kum maeni abiro anyong’a binegogi, man gibineno jampor i cing’ Zerubabel; maeni wang’ Yehova, m’uringo kun ku kun kud i ng’om ngung’.

¹¹ Alund aloko lembe, man awacu ire kumae, Yendulam ario maeni i ng’et thethala ma yor acwic man i cing’ ma yor acamne gin ang’o?

¹² E aloko lembe wang’ arionde, man awacu ire kumae, Jangulam ario maeni gin ang’o, ma gibedo i ng’et wendthala ario mi mola ma kwar ma mo mi mola ma kwar ubethiure kud i igi?

¹³ Man eloko lembe ira ewacu kumae, Ing’eyo ngo nia maeni en e ang’o? Man awacu kumae, Ungo, rwoth para.

¹⁴ Elund ewacu kumae, Maeni juario ma juwirogi, m’ucungo kum Rwoth mi ng’om ngung’.