Zekaria 12 - The Holy Bible In Alur (Lur) Revised Orthography

Maram Yerusalem Biboth Ko

¹ Ewolembe mi lembe pa Yehova pir Israel. Yehova, m’urieyo polo, m’uketho the ng’om, man m’ucwio tipo dhanu i ie, wacu kumae:

² Nen, abiketho Yerusalem ni kikombe mir awirawira ni kodhidhanu ceke m’utieko piny gbur, man ebiwok kum Yuda bende i atiek ma kum Yerusalem.

³ Man ebitimbre i ceng’ maeca, nia abidwoko Yerusalem ni kidi mi ter ni kodhidhanu ceke; dhanu ceke m’uting’e ni ter igi gibinwang’u rem ma dit; man thek ceke mi ng’om bicokri karacelo i kume.

⁴ I ceng’ maeca, Yehova wacu, abigoyo riuni kubang’gi nzu ku ndiri, man ng’atu m’ubedo i wie ke kud abelu; man abiyabu wang’a wi ot mi Yuda, man abigoyo riuni kubang’gi nzu mi kodhidhanu kud abinga.

⁵ Man rwodhi mi Yuda biwacu i adundegi kumae, Ju m’ubedo i Yerusalem gi tego para i Yehova mir udul ma Mungu migi.

⁶ I ceng’ maeca abiketho rwodhi mi Yuda calu tabu mi mac i kind yen, man calu ridhro m’uliel i kind kumna nganu; man gibicamu kodhidhanu ceke m’utieko piny gbur, yo ku cing’ ma yor acwic man yo ku cing’ ma yor acam; e ju mi Yerusalem fodi gibibedo kendo i kakagi ma dhe, cil i Yerusalem.

⁷ Yehova bende bilar bodho hema mi Yuda, kara dwong’ mi ot pa Daudi man dwong’ mi dhanu m’ubedo i Yerusalem kud uyungre m’usagu Yuda.

⁸ I ceng’ maeca Yehova bicungo i kum ju m’ubedo i Yerusalem; man ng’atu m’ubedo ng’ic i kindgi i ceng’ maeca bibedo calu Daudi; man ot pa Daudi bibedo calu Mungu, calu malaika pa Yehova i wang’gi.

⁹ Man ebitimbre i ceng’ maeca, nia abiyenyo anyoth thek ceke ma bibino kum Yerusalem.

¹⁰ Man abikonjo tipo mi bero ku kwac wi ot pa Daudi, man wi ju m’ubedo i Yerusalem; man gibineno i bang’a ma gicobo; e gibiywak pire, calu ng’atu ma ywak pi wode ma kulong’, man can binegogi pire, calu ng’atu ma can nego pi kayu pare.

¹¹ I ceng’ maeca ywak ma dit bibedo i Yerusalem, calu ywak mi Hadadrimon i poga mi Megidon.

¹² E ng’om biywak, ku ba juot tung’ tung’; juot mi ot pa Daudi tung’, mon migi de tung’; juot mi ot pa Nathan de tung’, mon migi de tung’;

¹³ juot mi ot pa Lawi de tung’, mon migi de tung’; juot mi Jucimei tung’, mon migi de tung’;

¹⁴ juot ceke m’udong’, juot kubang’gi nzu tung’, mon migi de tung’.