Zefania 1 - The Holy Bible In Alur (Lur) Revised Orthography

Nindo mi Kwinyo pa Yehova

¹ Lembe pa Yehova m’uwok ba Zefania ma wod Kuci, ma wod Gedalia, ma wod Amaria, ma wod Hezekia, i ceng’ pa Yosia ma wod Amon, m’ubimo mi Yuda.

² Abijigo wi gin ceke pet kud i wang’ ng’om, Yehova wacu.

³ Abijigo wi dhanu ku yedi; abijigo wi winyo ma kor polo, ku rec m’i nam, man gin ma redho jo karacelo ku judubo; man abithumo dhanu woko kud i wang’ ng’om, Yehova wacu.

⁴ Man abirieyo cinga wi Yuda, man wi dhanu ceke m’ubedo i Yerusalem; man abithumo dong’ dhanu mi Bal woko kud i ka maeni, man nying’ Jukemari ku julam;

⁵ ku ju ma rwo ni udul mi polo wi usimbru udi; man ju ma rwo, ma kwong’o kwong’ ni Yehova man ma kwong’o kwong’ ku Malkam;

⁶ ku ju m’udok cen kum lubo Yehova; ku ju m’uyenyo Yehova ngo, kadi m’upenje de ngo.

⁷ Bed ling’ i vut Rwoth Yehova; kum ceng’ pa Yehova ni ceng’ni: kum Yehova yiko lam, elonyo welo pare.

⁸ Man ebitimbre i ceng’ mi lam pa Yehova, nia abisendo judongomawijo, man wot ubimo, man wagi dhanu ceke m’ukendo kendi mi juwirok.

⁹ Man i ceng’ maeca abisendo dhanu ceke ma gipor ku pondot, ma gipong’o ot pa rwodhgi ku rop man abombi.

¹⁰ Man i ceng’ maeca, Yehova wacu, baywak bibedo nuti i dhugang’ mi rec, man goyonduru i ng’ete mir ang’wende, man bamor ma dit m’uai i ungulu gudi.

¹¹ Wugoi nduru, wu ju m’ubedo i Maktec; kum dhanu ceke mi Kanan wigi jik; dhanu ceke ma giyeyo ter mi mola ma tar juthumogi woko.

¹² Man ebitimbre i nindo maeca, nia abiyenyo i Yerusalem ku thala; man abisendo dhanu ma gigwokri gigi, ma giwacu yor i adundegi kumae, Yehova bitimo ber ungo, kadok rac de ebitimo ngo.

¹³ E lonyo migi bidoko ni ayeki, man udigi ni uvuru: eyo, gibigomo udi, ento gibibedo i igi ngo; man gibipidho podho mir ulok, ento gibimadhu pige ngo.

¹⁴ Ceng’ ma dwong’ pa Yehova ni ceng’ni, eni ceng’ni man etimbre pio, en e dwand ceng’ pa Yehova; dhanu ma tek ywak keca ku can.

¹⁵ Ceng’ maeca en e ceng’ mi kwinyo, en e ceng’ mi can ku mono, ceng’ mi nyoth kud uvuru, ceng’ mi piny ma col man abu, ceng’ mir afuru man piny ma col bii,

¹⁶ ceng’ mir a wara ku lemndiri, kum adhura ma tek mang kum gang’ m’utingre.

¹⁷ Man abikelo mono wi dhanu, kara giwoth calu dhanu m’abinga, kum gidubo kum Yehova; man rimbgi jubikonjo woko calu utur, man ring’kumgi calu weyo.

¹⁸ Kadok mola ma tar migi kadi mola ma kwar migi bicopo bodhogi ngo i ceng’ mi kwinyo pa Yehova; ento ng’om dho biwang’ ku mac mi ngiri pare: kum ebijigo, eyo, ebijigo ku ndiri, dhanu ceke m’ubedo i ng’om.