Zaburi 91 - The Holy Bible In Alur (Lur) Revised Orthography

Bedo i Tipopiny pa Jategokpo

¹ Ng’atu m’ubedo i kapondo pa Ng’atu ma Malu Ngbir Bibedo i tipopiny pa ng’atu ma Jategokpo.

² Abiwacu pi Yehova kumae, En e ka pondo para man ot ma tek para; Mungu para, m’agene.

³ Kum ebileri ni uwic pa jacikwinyo, Man ni thong’om ma kothe rac.

⁴ Ebiumi the yuke, Man ibipondo the bombe: Lemandha pare en e ban man thungu.

⁵ Lworo binegi ngo kum gin ma nyayu ndiri ku diewor, Kadi kum athero ma ringo ngia ku dieceng’;

⁶ Kum thong’om ma wotho kud i mu dho, Kadi kum nyoth ma nyotho ku dieceng’.

⁷ Dhanu rubanga bipodho i ng’eti, Man i cingi ma yor acwic ke rubanga apar; Ento ebibino ceng’ni i vuti ngo.

⁸ Ibineno ku weng’i kende, Man ibineno sukulia mi judubo.

⁹ Kum in, E Yehova, in i kapondo para! Iketho Ng’atu ma Malu Ngbir ni kabedo peri;

¹⁰ Gin ma rac bitimbre i kumi ngo, Kadok thong’om moko de biwok ceng’ni vut hema peri ngo.

¹¹ Kum ebing’olo ni malaika pare gikuri, Kara gigwoki i yo peri ceke.

¹² Gibitheng’i malu i cing’gi, Kara tiendi kud ucwanjre kum kidi.

¹³ E ibinyono umvor kud urobi: Nyathin umvor ku thwol de ibinyono the tiendi.

¹⁴ Kum eketho mer pare i kuma, ka ku meno abibodhe: Abidode malu, kum eng’eyo nyinga.

¹⁵ Ebilwong’a, e abidwoko ire lembe; Wabibedo wakude i can: Abibodhe, man abiyunge.

¹⁶ Abikwio cwinye ku nindo ma dupa, Man abinyutho ire both para.