Zaburi 86 - The Holy Bible In Alur (Lur) Revised Orthography

Kwac ya Mungu Nyuth Kisa Asu

¹ Leng’ ithi, E Yehova, man ilok ira lembe; Kum an a jacan man jacanpiny.

² Gwok ng’eyong’ec para; kum ayi Mungu ni i kuma: E in i Mungu para, gwok jatic peri m’ugeni.

³ Bed ku kisa i kuma, E Rwoth; Kum aywak ceng’ du i beng’i.

⁴ Nyai anyong’a i ng’eyong’ec pa jatic peri; Kum ating’o ng’eyong’ec para i beng’i, E Rwoth.

⁵ Kum in, Rwoth, i ber, man ibedo ayika mi weko dubo, Man i dit i mer mi bero ni dhanu ceke m’ulwong’i.

⁶ Cik ithi ba rwo para, E Yehova; Man iwinj dwal mi kwac para.

⁷ I ceng’ mi can para abilwong’i; Kum ibiloko ira lembe.

⁸ Ng’atu moko mbe ma calu in i kind udul mungu, E Rwoth; Kadok tic moko de mbe ma calu tic peri.

⁹ Thek ceke m’itimo bibino man gibirwo i weng’i, E Rwoth; Man gibiyungo nyingi.

¹⁰ Kum in i dwong’, man itimo gin ma wang’u ijo: In i Mungu i kendi.

¹¹ Ponja ku yo peri, E Yehova; abiwotho ku lemandha peri: Rib adundena kum lworo nyingi.

¹² Abipeki, E Rwoth Mungu para, kud adundena ceke; Man abiyungo nyingi mi nja,

¹³ Kum mer mi bero peri dit yor i bang’a; Man ibodho ng’eyong’ec para kud i liel ma piny.

¹⁴ E Mungu, jukuhaya gitingri i kuma, Man udul jurop giyenyo ng’eyong’ec para, Man gikethi ngo i wang’gi.

¹⁵ Ento in, E Rwoth, in i Mungu mi kisa man mi bero, Ibedo yo ni ng’ecwiny, man dit i mer mi bero ku lemandha.

¹⁶ A lokri i bang’a, man kisa negi i kuma; Mi tego peri ni jatic peri, Man ibodh wod bong’ peri.

¹⁷ Nyuth ira giranyutha mi bero, Kara ju m’udaga ginene, man lewic umakgi, Kum in, Yehova, ikonya, man ijuka.