Zaburi 85 - The Holy Bible In Alur (Lur) Revised Orthography

Kwac pi Kisa pa Mungu wi Israel

¹ Yehova, itimo ku bero ba ng’om peri; Idwoko ng’eca pa Yakobo.

² Iweko kier mi dhanu peri; Iumo dubo migi ceke. [Sela.

³ Ikabu kwinyo peri ceke woko; Ilokri giri ni lak ng’ecwiny peri.

⁴ Lokwa, E Mungu mi both mwa, Man keth ng’ecwiny peri ma yor i bang’wa thum.

⁵ Ng’ecwiny binegi i kumwa mi nja? Ibitelo ng’ecwiny peri ni dhanum’utuk ceke?

⁶ Ibimio iwa tego kendo ngo, Kara anyong’a neg dhanu peri ni kumi?

⁷ Nyuth iwa mer mi bero, E Yehova, Man imi iwa both peri.

⁸ Abiwinjo gin ma Mungu Yehova biyero; Kum ebiyero lem kwiocwiny ni dhanu pare, man ni jumaleng’ pare: Ento ku gilokri kendo ba lembe ma kite mbe.

⁹ Andha both pare ni ceng’ni ju m’ulwore, Kara dwong’ ubed i ng’om mwa.

¹⁰ Kisa ku lemandha girombo karacelo; Bedopwe ku kwiocwiny gimothri ku cwic.

¹¹ Lemandha ai kud i ng’om; Man bedopwe neno piny kud i polo.

¹² Eyo, Yehova bimio gin ma ber; Man ng’om mwa bicego nyaine.

¹³ Bedopwe bicidho i wang’e, Man ebiketho dakutielo pare ni yo ma juwoth i ie.