Zaburi 80 - The Holy Bible In Alur (Lur) Revised Orthography

Kwac pi Dwogo mi Juisraeli

¹ Cik ithi, E Jakwac mir Israel, In m’itelo wi Yusuf calu udul rombe; In m’ibedo malu wi kerubi, irieny.

² Tug tego peri i wang’ Efraim ku Benyamin man Manase, Man ibin ibodhwa.

³ Lokwa kendo, E Mungu; Man iketh weng’i rieny, e wabiboth.

⁴ E Yehova Mungu mir udul, Ng’ecwiny binegi kum rwo mi dhanu peri rokani?

⁵ Imio igi cemo mi piwang’, Imio igi piwang’ ni giramadha ma dit.

⁶ Idwokowa ni rop ni judhugola mwa; Man judegi mwa ging’iero i kindgi gigi,

⁷ Lokwa kendo, E Mungu mir udul; Man iketh weng’i rieny, e wabiboth.

⁸ Iwodho ulok kud i Misiri: Iriemo thek woko, man ipidhe.

⁹ Iyiko ng’om i wang’e, Man ulage nyang’ hai, man epong’o ng’om.

¹⁰ Gudi bedo auma ku tipone, Man jange gi calu musonge pa Mungu.

¹¹ Eoro jange cil ba nam, Man lwithe ba Kulo.

¹² Nedi irwombo gang’kidine piny, Ketho nia dhanu ceke m’ukadhu kud i yoje gituro kume moko?

¹³ Kul m’i luli ginyothe, Man yedi m’i thim gicamu kume.

¹⁴ Wakwei, E Mungu mir udul, lokri kendo: Nen piny kud i polo, man nen, man ilieu ulok maeni,

¹⁵ Man ulok ma cingi ma yor acwic upidho, Man jange m’idwoko tek iri.

¹⁶ Juwang’e ku mac, jung’ole piny: Ginyothri ni juk mi weng’i.

¹⁷ Wek cingi bed wi ng’atu mi cingi ma yor acwic. Wi wod dhanu m’idwoke tek piri giri.

¹⁸ Kum kumeno wabidok cen ungo kud i beng’i: Mi iwa tego, e wabilwong’o nyingi.

¹⁹ Lokwa kendo, E Yehova Mungu mir udul; Keth weng’i rieny, e wabiboth.