Zaburi 7 - The Holy Bible In Alur (Lur) Revised Orthography

Daudi Kwayu Pokolembe ma Cu wi Bedocu Pare

¹ E Yehova Munguna, apondo i beng’i: Bodha ni dhanu ceke m’uriema, man ilara.

² Gimaru yeco ng’eyong’ec para pamir umvor, Gikor ie nziki nziki, kinde ma ng’atu moko mbe m’ubodho.

³ E Yehova Munguna, tek atimo maeni; Tek kier ni i cinga;

⁴ Tek adwoko lembe ma rac ni ng’atu ma wabedo ku kwiocwiny wakugi (Eyo, acibo ng’atu ma jasend para ma lembe mbe);

⁵ Wek jadegi riem ng’eyong’ec para, man erube; Eyo, wek enyon kwo para piny i ng’om, Man eketh dwong’ para i utur. [Sela.

⁶ Ai, E Yehova, i ng’ecwiny peri; Tingri malu wi rop mi jusend para, Man iceu pira: ing’olo lembapoka.

⁷ Man wek cokri mi kodhidhanu gitieki gbur; Man idwog i wigi ku malu.

⁸ Yehova poko lembe wi kodhidhanu: Pok lembe para calku bedopwe para, E Yehova, man calu bedocu para ma ni i ia.

⁹ A wek dubo mi judubo thum, ento keth ju ma pwe cungi: Kum Mungu ma pwe mulo pidoic kud adunde.

¹⁰ Ban para ni karacelo ku Mungu, M’ubodho ju ma adundegi atira.

¹¹ Mungu en e japoklembe ma pwe, Eyo, en e Mungu ma ng’ecwiny nege ku ba ceng’.

¹² Tek ng’atu moko lokre ngo, ebipaku palamularu pare; Egomo atum pare, man eyike;

¹³ Eyiko ire jamtic mi tho bende; Etimo athero pare mi mac.

¹⁴ Nen, ebedo ku remokum mi nyol ku kier; Eyo, egamu ic mi kier, man enyolo ndra.

¹⁵ Etimo vur, man ekunye, Man epodho i ora m’etimo.

¹⁶ Kier pare bidwogo i wie gire, Man rop pare biloro piny i wie gire.

¹⁷ Abifoyo Yehova calku bedopwe pare, Man abiwero pak ni Yehova ma Malu Ngbir.