Zaburi 6 - The Holy Bible In Alur (Lur) Revised Orthography

Kwayu Kisa i Saa mi Masendi

¹ E Yehova, kud ijuka ku ng’ecwiny peri, Kadok aponja de kud iponja ku kwinyo peri ma lake tek.

² Bed ku kisa i kuma, E Yehova; kum amok: E Yehova, canga; kum cogona nwang’u can.

³ Ng’eyong’ec para bende ng’abre dit: Man in, E Yehova, rokani?

⁴ Dwogi, E Yehova, gony ng’eyong’ec para: Bodha ni kum mer mi bero peri.

⁵ Kum poi moko mbe piri i tho: Ng’a ma bifoi i lieli?

⁶ Aol ku cur para; Ku ba diewor atobo kavuto para; Akwoyo kavuto para ku piwang’a,

⁷ Wang’a jung’ kum can para; ejobo bel ni kum jusend para ceke.

⁸ Wuai kud i kuma, wu jutim kier ceke; Kum Yehova winjo dwal mi ywak para.

⁹ Yehova winjo kwac para; Yehova bijolo rwo para.

¹⁰ Jubiketho lewic wi judegi para ceke man cwinygi bing’abre: Gibilokri cen, jubicoro lewic i wigi.