Zaburi 4 - The Holy Bible In Alur (Lur) Revised Orthography

Rwo mir Uthieno mi Genogen i Mungu

¹ Lok ira lembe kinde m’alwong’o, E Mungu mi bedopwe para; Imio ira kaka kinde m’ani i can: Bed ku kisa i kuma, man iwinj rwo para.

² E wu wot dhanu, dwong’ para bilokre ni umbeyung rokani? Wubimaru gin ma ie nanu, man wubiyenyo lembe ndra rokani? [Sela.

³ Ento wung’ei nia Yehova koyo ng’atu ma ayi Mungu ni i kume ire gire: Yehova biwinjo kan alwong’e.

⁴ Bebe timwu, endre kud wudubi: Wuwec ku i adundewu wi kavuto mu, man wubed ling’. [Sela.

⁵ Wuthier lam mi bedopwe, Man wuketh genogen mu ba Yehova.

⁶ Dhanu dupa giwacu kumae, Ng’a ma binyutho iwa bero? Yehova, ting’ der mi weng’i i wiwa.

⁷ Iketho mutoro i adundena, Ma sagu migi kinde ma cam migi ku pigulok migi ma nyen unyai.

⁸ Abivuto man abinindo i kwiocwiny; Kum in, Yehova, i kendi iketho abedo museme.