Zaburi 29 - The Holy Bible In Alur (Lur) Revised Orthography

Dwand Mungu Winjre i Wavuvu

¹ Wumi ni Yehova, E wu wot jurukara, Wumi ni Yehova dwong’ ku tego.

² Wumi ni Yehova dwong’ m’uromo ku nyinge; Wurwo ni Yehova ku bero mi leng’.

³ Dwand Yehova ni wi pi: Mungu mi dwong’ umor, En e Yehova wi pi dupa.

⁴ Dwand Yehova tek; Dwand Yehova pong’ ku gin ma ng’oyo ndiri.

⁵ Dwand Yehova turo musonge; Eyo, Yehova turo musonge mi Lebanon nziki nziki.

⁶ Eketho gipor bende calu nyathi dhi ang’; Lebanon ku Sirion calu koni dhiang’ ma nok m’i thim.

⁷ Dwand Yehova poko i lebmac.

⁸ Dwand Yehova yengo langa; Yehova yengo langa mi Kadec,

⁹ Dwand Yehova ketho ruda nyol, Man elwero luli mbwe: Man i hekalu pare gin ceke wacu kumae, Dwong’.

¹⁰ Yehova bedo calu Ubimo dhu Pi m’ucore; Eyo, Yehova bedo calu Ubimo mi nja.

¹¹ Yehova bimio tego ni dhanu pare; Yehova bimio mugisa ni dhanu pare ku kwiocwiny.