Zaburi 25 - The Holy Bible In Alur (Lur) Revised OrthographyKwayu pi Telowic, ku Lony mi Dubo man Gwok 1 E Yehova, ating’o ng’eyong’ec para malu i beng’i. 2 E Munguna, ageno in. Kud iyi lewic umaka; Kud iyi judegi para voya. 3 Eyo, jumoko m’ukuri mbe ma jubiketho lewic umakgi: Lewic bimaku ju ma timo rop ma there mbe. 4 Nyuth ira yo peri, E Yehova: Ponja ku yo peri. 5 Tel wia i lemandha peri, man iponja; Kum in i Mungu mi both para; Akuri ceng’ du. 6 E Yehova, poi kum ngisi peri ku mer mi bero peri; Kum gigamu bedo nuti con. 7 Kud ipoi pi dubo mir aradu para, kadi camuco para; Poi pira calku mer mi bero peri, Kum bero peri, E Yehova. 8 Yehova e ber man pwe: Ka kumeno ebiponjo judubo i yo. 9 Ebitelo wi ju ma mol i pokolembe; Man ebiponjo ju ma mol ku yo pare. 10 Yo pa Yehova ceke en e mer mi bero ku lemandha Ni wadi ju m’uworo lembariba pare ku lembatuca pare. 11 Ni kum nyingi, E Yehova, Wek kier para woko, kum en e dit. 12 Ng’atu ma kani ma lworo Yehova? Ebiponje i yo m’ebifoyo. 13 Ng’eyong’ec pare bibedo yo; Man ng’om bibedo ni aba ni nyikwaye. 14 Lembapora pa Yehova ni ba ju m’ulwore; Man ebinyutho igi lembariba pare, 15 Wang’a ni yo ba Yehova thiri thiri; Kum ebiwodho tienda kud i voi. 16 Lokri i bang’a, man bed ku kisa i kuma: Kum wang’a bedo lic man jusenda. 17 Can mir adundena doko dit: A wodha woko kud i can para. 18 Pid pi masendi para man tagu para: Man iwek dubo para ceke woko. 19 Pid pi judegi para, kum gi dupa; Man gidaga kud adegi mi rop. 20 A gwok ng’eyong’ec para, man ibodha: Kud iyi lewic umaka, kum apondo i beng’i. 21 Wek bedocu ku bedopwe gigwoka, Kum akuri. 22 War Israel, E Mungu, Kud i can pare ceke. |
The Holy Bible In Alur (Lur), Revised Orthography © United Bible Societies, 1970.
Bible Society of the Democratic Republic of Congo