Zaburi 2 - The Holy Bible In Alur (Lur) Revised Orthography

Nindo mi Camuker pa Ng’atu ma Yehova Wiro

¹ Nedi thek gitimbri swa, Man kodhidhanu pido pi gin ma kulokane mbe?

² Ju m’ubimo m’i ng’om gicoko dhoggi, Man jubim giporo lembe karacelo, Kum Yehova, man kum ng’atu m’awira pare, ma giwacu ko kumae,

³ Wek watur giratwia migi cen, Man wabai thol migi cen kud i kumwa.

⁴ Ng’atu m’ubedo i polo bing’iero; Rwoth bicayugi.

⁵ Ebilund weco i bang’gi ku kwinyo pare, Man ebisendogi ku ng’ecwiny pare:

⁶ Ento aketho ubimo para Wi got para ma leng’ mi Sayuni.

⁷ Abiyero pi lembang’ola: Yehova wacu ira kumae, In i woda; Tin anyoli.

⁸ Penja, man abimio iri thek ni aba peri, Man ng’et ng’om ma wi tung’ ni piny peri.

⁹ Ibiturogi ku dul mi nyunyu; Ibing’enyogi nziki nziki calu agulu pa jacwiagulu.

¹⁰ Nie ka kumeno wubed riek, E wu ju m’ubimo: Wuponjru, wu jupoklembe m’i ng’om.

¹¹ Wutim ni Yehova ku lworo, Man anyong’a negwu ku mielkum.

¹² Wucwi limb wod, ng’ecwiny umaru nege, man wunyothru i yo, Kum kwinyo pare dhingo opo. Mugisa ni dhanu ceke m’upondo i bang’e.