Zaburi 16 - The Holy Bible In Alur (Lur) Revised Orthography

Musolu ma Ber

¹ Gwoka, E Mungu; kum apondo i beng’i.

² E ng’eyong’ec para, iwacu ni Yehova kumae, In i Rwoth para: Bero mbe kuda ndhu i beng’i.

³ Ni jumaleng’ ma gini i ng’om, Gin gi ju ma ber hai ma anyong’a para ceke ni i bang’gi.

⁴ Can migi bimedre gi ju ma gimio giramia ni mungu mange: Girathiera migi m’amadha mi rimo abikonjo ngo, Kadi abiting’o nying’gi de ngo wi dendhoga.

⁵ Yehova en e makapiny mir aba para man mi kikombe para: Igwoko gagi m’upodho i wia.

⁶ Thol upodho ira i ka ma ber; Eyo, abedo ku musolu ma ber.

⁷ Abimio mugisa ni Yehova, m’umio ira lembapora; Eyo, adundena ponja i nindo mi diewor.

⁸ Aketho Yehova i wang’a thiri thiri: Kum eni i cinga ma yor acwic, cwinya biringo ngo.

⁹ Ka kumeno mutoro nego adundena, man anyong’a nego dwong’ para: Ring’kuma bende bibedo ku genogen,

¹⁰ Kum ibiweko ng’eyong’ec para ngo i liel: Kadi ng’atu maleng’ peri de ibiweko ngo ya enen top.

¹¹ Ibinyutho ira yo mi kwo: Udul mi mutoro ni i weng’i; Mutoro mi nja ni i cingi ma yor acwic.