Zaburi 15 - The Holy Bible In Alur (Lur) Revised Orthography

Ju ma Gibibedo wi Got ma Leng’ pa Mungu

¹ Yehova, ng’a ma bibedo i hema peri nindo moko? Ng’a ma bibedo wi got peri ma leng’i?

² Ng’atu ma wotho atira, ma timo bedopwe, Man ma yero lemandha i adundene;

³ Ng’atu ma yero nying’ ungo ku lebe, Kadi ma timo wadi rac ungo, Kadi ma cayu cac kum jadhugola pare ngo;

⁴ I wang’e ng’atu ma rac jujwige, Ento m’eyungo ju ma lworo Yehova; Ng’atu ma kwong’o kwong’ ma time rac, man elokre ngo;

⁵ Ng’atu ma ketho sente pare ngo ni kuloka mir azindi, Kadi ma gamu sukulia ngo kum ju ma lembe mbe i wigi. Ng’atu ma timo gin maeni lembe biringo ku cwinye ki ngo.