Zaburi 146 - The Holy Bible In Alur (Lur) Revised Orthography

Foc pi Timotim ma Pwe pa Yehova

¹ Wupak Yehova. Pak Yehova, E ng’eyong’ec para.

² Kinde m’abedo kwo abipaku Yehova: Abiwero pak ni Mungu para kinde m’abedo kwo.

³ Kud igen judongomawijo, Kadi wod dhanu, ma kony umbe bang’e.

⁴ Yuyo pare wok, man edok ba ng’om pare; I ceng’ maeni nini pidoic pare rwinyo.

⁵ Ng’atu m’ubedo ku Mungu pa Yakobo ni kony pare en e jamutoro, Ma genogen pare ni i Yehova Mungu pare:

⁶ M’ucwio polo ku ng’om, Nam, ku gin ceke ma ni i igi de; M’ugwoko lemandha mi nja;

⁷ M’utimo lembapoka ni ju ma jusendogi; M’umio cemo ni ju ma kec unegogi. Yehova gonyo jukol;

⁸ Yehova yabu wang’ abinga; Yehova ting’o ju m’ugung’ piny; Yehova maru ju ma pwe;

⁹ Yehova gwoko umondo; Ejengo kic ku dhaku ma cware tho; Ento egondo yo pa jadubo.

¹⁰ Yehova bicamu ker mi nja, E Sayuni, Mungu peri cil kum dhanum’uthuk ceke. Wupak Yehova.