Zaburi 143 - The Holy Bible In Alur (Lur) Revised OrthographyKwac pi Gony ku Telowic 1 Winj rwo para, E Yehova; leng’ ithi ba kwac para: Lok ira lembe i bedo mandha peri, man i bedopwe peri. 2 Man kud imond i pokolembe ku jatic peri; Kum ng’atu moko mbe ma kwo ma pwe i weng’i. 3 Kum jadegi sendo ng’eyong’ec para; Egoyo kwo para piny i ng’om: Eketho abedo i ka ma col, calu ju m’utho con. 4 Ka kumeno cwinya voc yor i ia; Adundena bedo rwa yor i ia. 5 Apoi kum ceng’ ma con; Ia pido kum giratima peri ceke; Ia pido kum tic m’i cingi. 6 Athang’u cinga iri: Rieu nego ng’eyong’ec para i kumi, calu ng’om m’uthwo. [Sela. 7 Tim pio ilok ko ira lembe, E Yehova; cwinya voc: Kud ipan weng’i ira, Amaru doko calu ju m’uloro piny i vur. 8 Keth awinj mer mi bero peri kugweno; Kum ageno in: Keth ang’ei yo m’awoth i ie; Kum ating’o ng’eyong’ec para i beng’i. 9 E Yehova, bodha ni judegi para: Aringo i beng’i nipondo. 10 Ponja ku timo yeny ma ii yenyo; Kum in i Mungu para: Tipo peri e ber; Tela i ng’om m’atira. 11 Yep cwinya E Yehova, ni kum nyingi. Ni kum bedopwe peri wodh ng’eyong’ec para kud i can. 12 Man ni kum mer mi bero peri kab judegina woko, Man inyoth dhanu ceke m’usendo ng’eyong’ec para; Kum an a jatic peri. |
The Holy Bible In Alur (Lur), Revised Orthography © United Bible Societies, 1970.
Bible Society of the Democratic Republic of Congo