Zaburi 141 - The Holy Bible In Alur (Lur) Revised Orthography

Kwac pi Gwok ni Dubo

¹ Yehova, alwong’i; bin pio i bang’a: Leng’ ithi ba dwanda, kinde m’alwong’i.

² Wek rwo para idh i weng’i calu udok ma ng’wice ng’ar: Ting’ocing’ para de calu lam mir uthieno,

³ E Yehova, keth jakur i wang’ dhoga; Gwok dhugola mi dendhoga.

⁴ Kud ilok adundena ba gin moko ma rac, M’uketh atim tic mi dubo Karacelo ku dhanu ma timo kier: Man kud iyi acam cemo migi ma mit.

⁵ Wek ng’atu ma pwe goya, e ber; Man wek ejuka, ebibedo calu mo i wie: Kud iyi wia kwere: Kum cil i dubo migi rwo para bibedo asu.

⁶ Jupoklembe migi juredho piny ng’et cana; Man gibiwinjo lembe para; kum gi mit.

⁷ Calu ka ng’atu moko furo fur man etong’o ng’om, Cogo mwa kethre dhu liel.

⁸ Kum wang’a ni yor i beng’i, E Yehova ma Rwoth: Apondo i beng’i; kud iwek ng’eyong’ec para bed rwa.

⁹ Gwoka ni uwic ma giciko ira, Man ni ngbak mi jutim kier.

¹⁰ Wek judubo gipodh i voi migi gigi, Kinde m’akadhu.