Zaburi 135 - The Holy Bible In Alur (Lur) Revised Orthography

Yehova e Dwong, mungu m’araga Gi Mananu

¹ Wupak Yehova, Wupak nying’ Yehova; Wupake, E wu jutic pa Yehova,

² Wun ma wucungo i ot pa Yehova, I lelagang’ mi ot pa Mungu mwa.

³ Wupak Yehova; kum Yehova e ber: Wuwer pak ni nyinge; kum en e mit.

⁴ Kum Yehova goyo wi Yakobo ire gire, Man Israel ni piny pare gire.

⁵ Kum ang’eyo nia Yehova e dit, Man nia Rwoth mwa eni i wi mungu ceke.

⁶ Gin ma tek nyayu mutoro i Yehova, etimo maeno, I polo man i ng’om, i nam man i ka ma thuth ceke;

⁷ M’uketho afuru idho kud i tung’ ng’om; M’etimo lukoth ni koth; M’ewodho yamu woko kud i kakanpiny pare;

⁸ M’egoyo kayu mi Misiri, Mi dhanu ku lim bende;

⁹ M’eoro giranyutha ku musana i die ii, E Misiri, Wi Farao, man wi jutic para ceke;

¹⁰ M’egoyo thek dupa, M’enego ju m’ubimo ma tek de,

¹¹ Sihon m’ubimo mi Juamori, Man Og m’ubimo mi Bacan, Man ker ceke mi Kanan,

¹² Man emio ng’om migi ni aba, Aba ni Israel ma dhanu pare

¹³ Nyingi bedo mi nja, e Yehova; Nyingi mi poi, E Yehova, cil kum dhanum’utuk ceke.

¹⁴ Kum Yehova bipoko lembe mi dhanu pare, Man ebilokre gire kum jutic pare.

¹⁵ Mungu m’araga mi thek gi mola ma tar ku mola ma kwar, En e tic m’i cing’ dhanu.

¹⁶ Dhoggi nuti, ento giweco ngo; Wang’gi nuti, ento gineno ngo;

¹⁷ Ithgi nuti, ento giwinjo ngo; Kadok yuyo de mbe i dhoggi.

¹⁸ Ju m’utimogi bibedo cal kugi; Eyo, ku ba dhanu ceke m’ugenogi.

¹⁹ E ot mir Israel, wumi mugisa ni Yehova: E ot pa Harun, wumi mugisa ni Yehova:

²⁰ E ot pa Lawi, wumi mugisa ni Yehova: Wun ma wulworo Yehova, wumi mugisa ni Yehova.

²¹ Mugisa m’uai kud i Sayuni ubed ni Yehova, M’ubedo i Yerusalem. Wupak Yehova.