Zaburi 132 - The Holy Bible In Alur (Lur) Revised OrthographyKwac pi Mugisa wi Kamaleng’ 1 Yehova, poi kum Daudi Kum masendi pare ceke: 2 Maram ekwong’o ko ni Yehova, Man eng’olo lembe ni Ng’atu Matek pa Yakobo kumae: 3 Andha abimondo i hema mi ot para ngo, Kadi idho wi kavuto para; 4 Abimio nindo ni wang’a ngo, Kadi rip rip ni biendwang’a; 5 Cil m’anwang’u ko kaka ni Yehova, Hema ni Ng’atu Matek pa Yakobo. 6 Nen, wa winjo piri i Efratha: Wanwang’e i podho mi luli. 7 Wabimondo i hema pare; Wabirwo ng’et kom mi tiende. 8 E Yehova, ai imond i kayom peri; In, ku sanduk mi tego peri. 9 Wek julam peri gironjri ku bedopwe; Man wek jumaleng’ peri kok ni mutoro. 10 Ni kum jatic peri ma Daudi Kud ilok wang’ ng’atu m’iwiro peri cen. 11 Yehova kwong’o ni Daudi ku lemandha; Ebidok cen ungo kud i kume: Abiketho kodhi mi kumi wi komker peri. 12 Tek nyithindho peri giworo lembariba para Ku lembatuca para m’abiponjo kogi, Nyithindho migi bende bijany wi komker peri mi nja. 13 Kum Yehova goyo wi Sayuni; Eyenye ni kabedo pare, 14 Maeni kayom para mi nja: Abibedo kakeni; kum ayenye. 15 Abimio mugisa dit wi cemo pare: Abiyeng’o jucan pare ku kwen. 16 Abironyo julam pare ku both; Man jumaleng’ pare bikok ma tek ku mutoro. 17 Abiketho tung pa Daudi kudo kuca: Aketho thala ni ng’atu m’awira para. 18 Abironyo judegi pare ku lewic; Ento jamkermiwic pare bimeu i wie gire. |
The Holy Bible In Alur (Lur), Revised Orthography © United Bible Societies, 1970.
Bible Society of the Democratic Republic of Congo