Zaburi 104 - The Holy Bible In Alur (Lur) Revised Orthography

Mungu Gwoko Giracwia Pare

¹ Mi mugisa ni Yehova, E ng’eyong’ec para. E Yehova Munguna, in i dwong’ hai; Ibedo aronya ku yung man dwong’:

² M’iumbri giri ku der calu ku kendi; M’irieyo polo calu kusika mi bongu;

³ M’iketho riu mi ot pare i pi; M’eketho afuru ni magali pare; M’ewotho wi bomb yamu;

⁴ M’etimo yamu ni jukwenda pare; Lebmac ni jutim pare;

⁵ M’eketho thepiny mi ng’om, Kara kud eai mi nja.

⁶ Iume ku nam calu ku kendi; Pi cungo malu wi gudi.

⁷ Ni juk peri giringo; Ni badwal mi morpolo peri giringo

⁸ (Gudi tingri, poga mwony) I ka m’iketho igi.

⁹ Iketho kieu kara ku gikadhi; Kara ku gidwog kendo gium ng’om.

¹⁰ Ewodho pi i poga; Giringo kind gudi;

¹¹ Gimio giramadha ni yedi m’i thim ku bang’gi kubang’gi; Kana m’i thim gikwio rieu migi.

¹² Winyo m’i polo gibedo ku kabedo migi i vutgi; Giwero wer i kind jangyen.

¹³ Ekonjo pi wi gudi kud i ot pare: Ng’om upong’ ku nying’ tic peri.

¹⁴ Eketho lum utwi ni lim, Man uboko ni tic mi dhanu; Kara ewodh cam kud i ng’om.

¹⁵ Man pigulok ma nyayu mutoro i adu nde dhanu, Man mo kara urieny wang’e, Man kwen ma mio tego ni adunde dhanu.

¹⁶ Yedhi pa Yehova yeng’ ku pige, Musonge mi Lebanon, m’epidho;

¹⁷ Ka ma winyo gomo ie odgi: Ugoro de, sipre en e ot pare.

¹⁸ Gudi ma dongo en e mi diegi m’i thim; Cana en e kapondo mir uduka.

¹⁹ Eketho dwi mi nindo: Ceng’ ung’eyo mwony pare.

²⁰ Itimo mudho, man en e diewor, Ma yedi m’i luli ceke giwok woko i ie.

²¹ Nyithindh umvor giywak tok mak migi, Man giyenyo cemo migi ba Mungu.

²² Ceng’ wok, e gilui, E givuto i kapondo migi.

²³ Man dhanu cidho ba tic pare Man ba tic pare ma tek cil uthieno.

²⁴ E Yehova, tic peri ku diti! Itimogi ceke ku rieko: Ng’om upong’ ku giracwia peri.

²⁵ Kuca nam, ma dit ma lac de, Gin ma mulo ma kwandre ngo ni i ie, Yedi ma thindho ku ma dongo de.

²⁶ Combo cidho kuca; Nyang’ ma dit ni kuca, m’itimo kara etuk i ie.

²⁷ Maeni ceke gikuro in, Kara imi igi cemo migi i nindone.

²⁸ Imio igi, gicoko; Iyabu cingi, giyeng’ ku gin ma ber.

²⁹ Ipanu weng’i, cwinygi dieng’; Ikabu yuyo migi, githo, Man gidoko ni utur kakagi.

³⁰ Ioro Tipo peri, gicwiri; Man idwoko wang’ ng’om nyen.

³¹ Wek dwong’ pa Yehova bed mi nja; Wek anyong’a neg Yehova ni kum tic pare:

³² M’uneno wi ng’om, e eyengre; Emulo gudi, man giwodho yiro.

³³ Abiwero ni Yehova cil m’abedo ko kwo: Abiwero pak ni Mungu para kinde m’abedo kwo.

³⁴ Wek pidoic para bed mit ire: Anyong’a binega ni kum Yehova.

³⁵ Wek judubo githum kud i ng’om. Man wek judubo ku gibed nuti kendo. Mi mugisa ni Yehova, E ng’eyong’ec para. Wupak Yehova.