Zaburi 101 - The Holy Bible In Alur (Lur) Revised Orthography

Lembang’ola pi Bedopwe

¹ Abiwero pi mer mi bero ku pokolembe: Abiwero pak iri, E Yehova

² Abitingra gira ku rieko i yo ma cu: A ibibino i bang’a awene? Abiwotho kud adundena ma cu i ot para.

³ Abiketho gin moko ma rac ungo i wang’a: Adagu tic mi ju m’ukier; Ebimoko i kuma ngo.

⁴ Adunde mi lem ma kite mbe biai i bang’a: Abing’eyo gin moko ma rac ungo.

⁵ Abinyotho ng’atu ma yero nying’ jadhugola pare ling’: Abisendra ngo ku ng’atu ma ting’o wang’e malu m’ubedo kud adunde mi kuhaya de.

⁶ Wang’a bibedo wi weg bedo mandha i ng’om, kara wabed wakugi: Ng’atu m’uwotho i yo ma cu, ebitimo ira.

⁷ Ng’atu ma timo abombi bibedo i ot para ngo: Ng’atu ma yero ndra bicungo ngo i wang’a.

⁸ Ku ba rupiny ku ba rupiny abinyotho judubo ceke mi ng’om; Kara akab jutim kier ceke woko ku bang’ adhura pa Yehova.