Yohana 5 - The Holy Bible In Alur (Lur) Revised Orthography

Yesu Keyo Kum Ng’atu Acel Dhu Kut

¹ Yo ng’ei gin maeni agba mi Juyahudi nuti; man Yesu idho malu Yerusalem.

² Nwang’u kut nuti Yerusalem ceng’ni dhugang’ mi rombe, ma julwong’o ku dhu Juebrania Bethesda, ma pondode abic.

³ Udul ju ma kumgi lith uvuto i maeni, ku ju ma wang’gi cor, ku ju ma weg abala mi tielo, ku ju m’ulindri, ma gibekuro dhenyni mi pi:

⁴ kum nindo moko malaika pa Rwoth loro piny i kut, man eketho pi dhenyni: e ng’atu ma tek ular umondo yo ng’ei dhenyni mi pi e tho ceke m’unyang’ i kume kei ndhu.

⁵ Nwang’u ng’atu acel nuti keca, m’ebedo ku mulima rundi pier adek wi abora.

⁶ Ka Yesu nene m’ebevuto, eng’eyo de nia ebedo kumeno hai, ewacu ire kumae, Iyenyo kumi titre?

⁷ Ng’atu ma kume lith udwoko ire lembe kumae, Rwoth, ng’atu moko mbe ira, m’uketha i kut kinde ma pi bedhenyni: ento kinde ma abebino ng’atu mange lar loro ira.

⁸ Yesu wacu ire kumae, Ai malu ting’ kavuto peri, iwothi.

⁹ E ndhu ndhu nica kum ng’atuno titre, man eting’o kavuto pare ewotho. Nwang’u ceng’ nino ceng’ sabatu.

¹⁰ Kum kumeno Juyahudi wacu ni ng’atu ma kume kei nino kumae, Maeni ceng’ sabatu, man cik uyio ngo nik iting’ kavuto peri.

¹¹ Ento edwoko lembe igi kumae, Ng’atu m’utito kuma, e m’uwacu ira kumae, Ting’ kavuto peri, iwothi.

¹² Gipenje kumae, Ng’atu m’uwacu iri, Ting’ kavuto peri wothine en e ng’a?

¹³ Ento ng’atu ma kume kei ung’eyo ngo nia en e ng’a; kum Yesu wodhre cen, udul dhanu de ni kakeca.

¹⁴ Yo ku ng’ei gin maeni Yesu nwang’e i hekalu, ewacu ire de kumae, Nen, kumi titre ndhu: kud idong’ idub kendo ba, gin ma rac ma sagu maru wok i kumi.

¹⁵ Ng’atuno eidho ewacu de ni Juyahudi nia en e Yesu m’utito kume.

¹⁶ Man kum lembe nini Juyahudi ginyayu ragedo kum Yesu, kum etimo gin maeno i ceng’ sabatu.

¹⁷ Ento Yesu loko lembe igi kumae, Vwa ubetimo tic cil ku kawono de, man an de atimo tic.

¹⁸ Kum lembe nini Juyahudi yenyo kanege m’usagu, kum ekadhu ku wi cik mi ceng’ sabatu kende ngo, ento elwong’o Mungu ngi ya Won ma dhe, m’ekethre gire ro ku Mungu.

Wod Mungu Bedo ku Ng’ol

¹⁹ Yesu lund uloko lembe ewacu igi kumae, Andhandha, awacu iwu, Wod copo timo gin moko gire ngo ma k’eneno Wego betimo ngo: kum gin ma tek etimo, e Wod bende timo ginde kumeca.

²⁰ Kum Wego maru Wod, man enyutho ire gin ceke m’etimo en: man ebinyutho ire tic ma sagu maeni, kara iwu wang’.

²¹ Kum calu Wego ting’o ju m’utho, man emio igi kwo, e Wod bende mio kwo ni ju m’eyenyo kumeno.

²² Kum kadok Wego de poko lembe wi ng’atu moko ngo, endre emio lembapoka ceke ni Wod;

²³ kara dhanu ceke giyung Wod cil calu giyungo Wego. Ng’atu m’uyungo Wod ungo eyungo Wego m’uore de ngo.

²⁴ Andhaandha, awacu iwu kumae, Ng’atu m’uwinjo lem para, m’uyio ng’atu m’uora de, kwo ma rondo ku rondo ni kude, man ebino ngo i pokolembe, ento ekadhu kud i tho emondo i kwo.

²⁵ Andhandha awacu iwu kumae, Saa bebino, man enuti kawono, ma ju m’utho biwinjo ie dwand Wod Mungu; man ju m’uwinjo gibibedo kwo.

²⁶ Kum calu Wego bedo ku kwo i ie gire, cil kumeno emio ni Wod bende ku kwo i ie gire:

²⁷ man emio ire ng’ol m’etim ko lembapoka, kum en e Wod dhanu.

²⁸ Iwu kucj uwang’ kum lembe maeni: kum saa bebino, ma ju m’i liel ceke biwinjo ie dwande,

²⁹ man gibiwok woko; ju m’utimo ber, ni cer mi kwo; ju m’utimo rac ke, ni cer mi pokolembe.

Jum’unyutho pi Yesu

³⁰ Acopo timo gin moko gira ngo: calu awinjo, e apoko lembe: man pokolembe para de pwe; kum asayu yeny ma ia yenyo ngo, ento yeny ma i ng’atu m’uora yenyo re.

³¹ Tek anyutho lembe pira gira, nyutholembe para en e andha ngo.

³² Ng’atu mange e m’unyutho pira, e ang’eyo ya gin m’enyutho pira, en e andha.

³³ Wuoro kwenda ba Yohana, en de enyutho nia en e lemandha.

³⁴ Ento nyutholembe m’ajolo ai ba dhanu ngo: ento awacu gin maeni, kara wubothi.

³⁵ En e thala m’uliel m’urieny de; man wuyio ya anyong’a negwu mi nindo moko i der pare.

³⁶ Ento nyutholembe m’abedo ko e dit ma sagu Yohana; kum tic ma Wego mio ira adar, tic maeni m’atimo enyutho pira, nia Wego ora.

³⁷ Man Wego m’uora, enyutho pira. Fodi wuwinjo dwande ngo nindo moko, kadi kite de fodi wuneno ngo.

³⁸ Man wumbe ku lem pare m’ubedo i iwu: kum ng’atu m’eoro, wuyie ngo.

³⁹ Wuyenyo i lembagora pa Mungu, kum wuwacu nia nyo wubedo ku kwo ma rondo ku rondo i igi; maeni de gi gin m’unyutho lembe pira;

⁴⁰ man wuyenyo ngo wubin i bang’a, kara wubed ku kwo.

⁴¹ Agamu dwong’ ungo ba dhanu.

⁴² Ento ang’eyo wu ya wumbe ku mer pa Mungu i iwu giwu.

⁴³ Abino i nying’ Vwa, man wujola ngo: tek ng’atu mange bino i nyinge gire, wubijole.

⁴⁴ Wucopo yio nenedi ma wujolo dwong’ ng’atuman ba wadi man ba wadi, man wuyenyo dwong’ ungo m’uai ba Mungu m’e kende?

⁴⁵ Kud wuwac nyo nia abidotowu ba Wego: ng’atu m’udotowu nuti, en e Musa, ma wuketho genogen mu i kume.

⁴⁶ Kum tek wuyio Musa, kuno di wuyio an; kum egoro pira.

⁴⁷ Ento tek wuyio lembagora pare ngo, wubiyio lem para nenedi?