Yohana 2 - The Holy Bible In Alur (Lur) Revised Orthography

Ambadha i Kana

¹ Man i ceng’ mir adege ambadha nuti i Kana mi Galilaya; man min Yesu de ni kakeca:

² julwong’o Yesu bende, giku julubne de i ambadhane.

³ Kinde ma pigulok uthum, min Yesu wacu ire kumae, Pigulok migi mbe.

⁴ Man Yesu wacu ire kumae, Dhaku, ang’o ma wabedo ko wakudi? saa para fokuwok ungo.

⁵ Min uwacu ni jutic kumae, Gin ceke ma tek ewacu iwu ci, wutime.

⁶ Nwang’u juketho agulu pi mi kidi abusiel keca calu kura logo mi Juyahudi, ma adekapi ario kadi adek ka pong’o agulune acel.

⁷ Yesu wacu igi kumae, Wupong’ agulune ku pi. E gipong’ogi thur.

⁸ Man ewacu igi kumae, Kawono wutwom, wuter ba jadit mir ambadha. Gitero de.

⁹ E ka jadit mir agba bilo pi m’udoko ni pigulok kawono, man eng’eyo ngo ka m’eai i ie (endre jutic ma gitwomo pige ging’eyo), jadit mir agba lwong’o won ambadha,

¹⁰ man ewacu ire kumae, Ku ba dhanu ceke gilar gikelo pigulok ma mit; man ka dhanu madhu hai, e gikelo maeno ma mit nyanok: in ikanu pigulok ma mit cil kawono.

¹¹ Thekri mi giranyutha pare maeni Yesu timo i Kana mi Galilaya, man enyutho dwong’ pare; julubne de giyie.

¹² Yo ng’ei maeni eloro piny i Kapernaum, en, ku min, ku utumin, man julubne; man gibedo kuca ceng’ dupa ngo.

Yesu Wodho Ju M’ucido Hekalu

¹³ Man kadhukuwijo mi Juyahudi ni ceng’ni, Yesu de idho malu Yerusalem.

¹⁴ Man enwang’u ju m’uloko koni dhiang’ ku rombe, kud akuru, man ju m’uwilo sente de gibedo i hekalu:

¹⁵ man ekiedo thol ni del, ewodho kogi kud i hekalu, rombe ku koni dhiang’ bende; man eoyo sente mi juwil sente, ebolo mesa migi de;

¹⁶ man ewacu kumae ni ju m’uloko akuru, Wuwodh giki maeni woko; kud wudwok ot pa Vwa ni odkuloka.

¹⁷ Julubne poi nia egore kumae, Ava ot peri bicama.

¹⁸ Ka kumeno Juyahudi giloko lembe giwacu ire kumae, Giranyutha ang’o m’inyutho iwa kum itimo gin maeni?

¹⁹ Yesu dwoko lembe ewacu igi kumae, Wuyak hekalu maeni, man i ceng’ adek abiting’e malu.

²⁰ Ka kumeno Juyahudi wacu kumae, Jugomo hekalu maeni rundi pier ang’wen wi abusiel, in e m’ibiting’e malu ceng’ adeki?

²¹ endre eyero pi hekalu ma kume.

²² Ka kumeno ka juting’e ku kind ju m’utho, julubne gipoi nia yang’ eyero lembe maeni; e giyio lembagora pa Mungu, ku lembe ma Yesu yero de.

Yesu Ng’eyo Dhanu Ceke

²³ Nie kinde m’eni i Yerusalem i kadhukuwijo, i nindo mir agba, dhanu dupa giyio nyinge, ma gineno giranyutha pare m’etimoi.

²⁴ Ento Yesu nyebre gire ngo i bang’gi, kum eng’eyo dhanu ceke,

²⁵ kum eyenyo ngo nia ng’atu moko nyuth lembe pi dhanu; kum eng’eyo en lembe ma nuti i dhanu.