Yohana 16 - The Holy Bible In Alur (Lur) Revised Orthography

¹ Giki maeni ayero iwu, kara ku juketh wukier.

² Gibiwodhowu woko kud i cokri: eyo, saa bebino, nia ng’atu m’unegowu biwacu nyo ethiero rwo ni Mungu.

³ Man giki maeni gibitimo, kum ging’eyo Wego ngo, kadok an.

⁴ Ento ayero giki maeni iwu, kara ka saa migi bino, wupoi pigi, nia ayero iwu. Gin maeni ayero iwu ku kwong’a ngo, kum wanuti wakudu.

Tic pa Tipo Maleng’

⁵ Ento kawono acidho ba ng’atu m’uora; ng’atu moko de mbe i kindwu m’upenja kumae, Icidho kani?

⁶ Ento kum ayero giki maeni iwu, can upong’ i adundewu.

⁷ Ento ayero iwu lemandha: en e ber iwu nia acidhi; kum tek acidho ngo, Jajuk bibino i beng’wu ngo; ento tek acidho, abiore i beng’wu.

⁸ En de, kan ebino, ebituco wi ng’om pi dubo, man pi bedopwe, pi pokolembe de:

⁹ pi dubo, kum giyio ira ngo;

¹⁰ pi bedopwe, kum acidho ba Wego, wun de wunena kendo ngo;

¹¹ pi pokolembe, kum lem pa jadit mi ng’ombuni daru pokre.

¹² Giki dupa ni kuda m’ayer iwu, ento wucopo jologi ngo kawono.

¹³ Ento kan ebibino, en e Tipo mi lemandha, ebitelo wiwu i lemandha ceke: kum ebiyero gire ngo; ento gin ma tek ewinjo, e ebiyero ginde: man ebiyero iwu pi gin ma bibino.

¹⁴ Ebiyunga: kum ebigamu kum gin ma para, man ebiyero iwu.

¹⁵ Gin ceke ma tek Wego bedo ko en e para: ketho awacu, nia ebigamu kum gin ma para man ebiyero iwu.

Can Bilokre ni Anyong’a

¹⁶ Fodi nyanok, e wunena kendo ngo: fodi nyanok kendo de, ka wubinena.

¹⁷ Ka kumeno kind julubne moko wacu kumae i kindgi, Maeni ang’o m’eyero iwa kumae, Fodi nyanok, e wubinena ngo; fodi nyanok kendo de e wubinena: man, Kum acidho ba Wego?

¹⁸ Ka kumeno giwacu kumae, Maeni m’eyero kumae, Fodi nyanokni en e ang’o? Wang’eyo gin m’eyero ngo.

¹⁹ Yesu ng’eyo nia giyenyo gipenje, e ewacu igi kumae, Wupenjru i kindwu pi lembe maeni nia awacu kumae, Fodi nyanok, e wunena ngo, fodi nyanok kendo, e wubinena?

²⁰ Andhandha, ayero iwu, nia wubiywak ku goyo nduru de, ento anyong’a binego ng’om: can binegowu, ento can mu bilokre ni anyong’a.

²¹ Ka moc ugoyo dhaku can nege, kum saa pare wok: ento kan edaru nyolo nyathin epoi pi ndiba kendo ngo, ni anyong’a m’unege nia enyolo dhanu wok i ng’om.

²² Kumeno wun bende kawono can unegowu: ento abinenowu kendo, kan anyong’a binego adundewu, anyong’a mu de ng’atu moko mbe ma kabu kud i beng’wu.

²³ I ceng’ maeno wubipenja ku penji moko ngo. Andhandha, ayero iwu kumae, Tek wubikwayu gin moko ba Wego, ebimie iwu ku nyinga.

²⁴ Fodi wupenjo gin moko ngo ku nyinga: wupenji, man wubijolo kara juketh anyong’a mu pong’.

Adaru Voyo Ng’om

²⁵ Ayero gin maeni iwu ku lembabola: saa bebino, kan abiyero iwu kendo ngo ku lembabola, ento abiyero pi Wego kele.

²⁶ I ceng’ maeni wubikwayu ku nyinga: man awacu iwu ngo, nia abikwayu Wego piwu;

²⁷ kum Wego maruwu gire, kum wumara, man wuyio nia aai ba Wego.

²⁸ Aai ba Wego, man abino i ng’om kendo, aweko ng’om, man acidho ba Wego.

²⁹ Julubne giwacu kumae, Nen, kawono iyero kele, man iyero ku lembabola ngo.

³⁰ Kawono wang’eyo nia ing’eyo gin ceke, man can penji ma nia ng’atu moko penji ko negi ngo: kum lembe nini wayio nia iai ba Mungu.

³¹ Yesu loko igi lembe kumae, Kawono dong’ wuyio?

³² Nen, saa bebino, eyo, edaru wok, ma jubilaluwu i ie, ng’atuman thugi man thugi, man wubiweka dong’ kenda; ere abedo kenda ngo, kum Wego ni i bang’a.

³³ Ayero giki maeni iwu, kara wubed ku kwiocwiny ni kuma. Masendi ni i beng’wu i ng’om: ento dong’ cwinywu bed tek; avoyo ng’om.