Yoel 2 - The Holy Bible In Alur (Lur) Revised Orthography

¹ Wukudh agwara i Sayuni, man wugoi nduru i got para ma leng’; wek dhanu ceke m’ubedo i ng’om kumgi miel: kum ceng’ pa Yehova bino, kum eni ceng’ni;

² ceng’ mi mudho man mi piny ma gbuku, ceng’ mir afuru man mi mudho ma mbitu, calu piny ma ru moire wi gudi; dhanu ma dongo ma jutego de; fodi gibedo calu maeni ngo, kadok yo ng’eigi de bibedo kumeni ngo cil i rundi mi dhanum’utuk dupa.

³ Mac uwang’ i wang’gi; man i ng’eigi lebmac uliel: ng’om ubedo calu podho mir Aden i wang’gi, man i ng’eigi langa mir uvuru; eyo, man ng’atu moko mbe m’uboth igi.

⁴ Nen migi calu nen mi riuni; man calu ju m’ubedo wi riuni, giringo kumeca.

⁵ Calu ba magali die wi gudi gipor apora, calu ba lebmac m’uwang’u soka, calu dhanu ma tek ma juthero ni lwiny.

⁶ Kodhidhanu ni i ndiba i wang’gi; wang’ ceke lokre.

⁷ Giringo calu dhanu ma jutego; giidho wi gang’kidi calu dhanu mir ali; givodho kubang’gi nzu i yo migi, man ging’enyo piro migi ngo.

⁸ Kadok ng’atu acel de cwalu wagi ngo; givodho kubang’gi nzu ng’atuman i yo pare man i yo pare; man ging’enyo kud i jamtho, man gikier ungo.

⁹ Gipiei wi adhura; giringo wi gang’kidi; giidho malu i udi; gimondo ku wang’ot calu jakwo.

¹⁰ Ng’om uyengre i wang’gi; polo de yengre; ceng’ ku dwi de doko col, man cero de geng’o rieny migi.

¹¹ Man Yehova wodho dwande wang’ udul asikari pare; kum kagonjo pare e dit apila; kum e tek m’etimo lembe pare; kum ceng’ pa Yehova e dit man eng’oyo ndiri ma dit; man ng’a ma copo cire?

Kisa pa Yehova

¹² Ento cil kawono, Yehova wacu, wulokru i bang’a kud adundewu ceke, man ku wekocam, man ku ywak, ku goyonduru de:

¹³ man wuyec adundewu, kendi mu re ngo, man wulokru ba Yehova Mungu mu; kum en e won bero ku kisa, yo ni ng’ecwiny, man esagre i mer mi bero, man elokre ni dubo.

¹⁴ Ng’a m’ung’eyo tek ebidwogo man ebiloko cwinye, man ewek mugisa i ng’eye, cil girathiera mi mogo man girathiera m’amadha ni Yehova Mungu mu?

¹⁵ Wukudh agwara i Sayuni, wudwok wekocam leng’, wulwong’ cokri mi rwo;

¹⁶ wucok dhanu, wudwok cokri leng’, wucok dhanu m’uti, wucok nyithindho, ku ju ma dhodho thuno; wek won ambadha wok kud i kusika pare, man mugole kud i kusika pare.

¹⁷ Wek julam, ma jutim tim pa Yehova, giywak kind pondot ku pemblam, man wek giwac kumae, Wek dhanu peri, E Yehova, man kud imi camupacu peri ni cac, kara thek ubim wigi: nedi giwac i kind kodhidhanu kumae, Mungu migi ni kani?

¹⁸ Ngiri lund unego Yehova pi ng’om pare, man ngisi nege kum dhanu pare.

¹⁹ E Yehova loko lembe man ewacu ni dhanu pare kumae, Nen, abioro cam i beng’wu, man pigulok ma nyen, ku mo, e cwinywu bikwio kudo; man abidwokowu ni cac kendo ngo kind thek;

²⁰ ento abicoro njuru asikari ma yor ariwa ma malu cen kud i kumwu, man abirieme i ng’om ngele man uvuru, kume m’utelo yo i nam ma yo nyangu, man kume m’udong’ cen i nam ma yo reto; e ng’wice ma rac biduny, man ng’wice ma rac biidho malu, kum etimo gin ma dit.

²¹ Lworo kud unegi, E ng’om, anyong’a negi man ibed ku mutoro; kum Yehova timo gin ma dit.

²² Lworo kud unegwu, wu yedi m’i thim; kum kakwae mi langa loth, kum yen ucego nyinge, yendubolo kud ulok gicego tego migi.

²³ Ka kumeno anyong’a negwu, wu nyithindho mi Sayuni, man anyong’a negwu kum Yehova Mungu mu: kum emio iwu koth ma kwong’a i mukero ma pwe, man ekonjo koth iwu, koth ma kwong’a man koth ma cen, i dwi ma kwong’ane.

²⁴ Man lela bipong’ ku nganu, jambic de bipong’ hau ku pigulok ma nyen ku mo.

²⁵ Man abidwoko iwu rundi ma bonyo camu i ie, ku nyathi bonyo, man nyathin abirbir, ku kukun, njuru asikari para ma dit m’aoro i kindwu.

²⁶ E wubicamu dupa man wubiyeng’, man wubipaku nying Yehova Mungu mu, m’utimo musana kudu; e jubinyayu lewic wi dhanu para ki ngo.

²⁷ E wubing’eyo nia ani i kind Israel, man nia an a Yehova Mungu mu, man ng’atu moko mange mbe; e jubinyayu lewic wi dhanu para ki ngo.

Mungu Bikonjo Tipo Pare

²⁸ Man ebitimbre yo ng’eye, nia abikonjo Tipo para wi kum ceke; man wotwu ku nyigwu gibiewo, dhanu m’uti mu bileko lek, awobi mu bineno ginmawokiwang’:

²⁹ man abikonjo Tipo para wi jutic bende man wi bong’ i ceng’ maeca.

³⁰ Man abinyutho musana i polo man i ng’om: rimo, ku mac, man vira mi yiro.

³¹ Ceng’ bilokre ni mudho, dwi de ni rimo, ma fodi ceng’ ma dit pa Yehova mi ndiri fok’uwok ungo.

³² Man ebitimbre, nia ng’atu ma tek bilwong’o nying’ Yehova ebiboth; kum ju m’uboth bibedo i got Sayuni man i Yerusalem, calu Yehova wacu, man ju ma Yehova lwong’o bibedo i kind donge m’udong’.