Yocuwa 8 - The Holy Bible In Alur (Lur) Revised Orthography

Gimaku man Ginyotho Ai

¹ Man Yehova wacu ni Yocuwa kumae, Kud ilwor, kadi cwinyi de kud ung’ abre: gam dhanu ceke mir ali karacelo kudi, man wuai, wuidh malu ba Ai; nen, amio ubimo mi Ai i cingi, ku dhanu pare, man adhura pare, ku ng’om pare;

² man ibitimo kum Ai kud ubimo pare calu m’itimo kum Yeriko kud ubimo pare: ento ayekine, ku lim mir adhurane, wubigamu ni giramaci iwu giwu: dong’ iketh weg adhi i ng’ei adhurane.

³ Kum kumeno Yocuwa ai malu, ku dhanu mir ali ceke, kara giidh malu ba Ai: e Yocuwa goyo wi dhanu rubanga pier adek, dhanu ma tek ma jurukara, man eorogi ku diewor.

⁴ Man eng’olo igi, ewacu kumae, Nen, wubikanu adhi kum adhura, yo ng’ei adhurane; kud wucidh bor hai kud adhurane, ento wun ceke wubed ayika:

⁵ man an, ku dhanu ceke ma gini karacelo kuda, wabicoro kum adhurane. Man ebitimbre, kinde ma giwok nikiedo kudwa, calu ma kwong’a, nia wabiringo i wang’gi;

⁶ e gibiwok woko i tokwa, maram wapeyo kogi bor kud adhurane; kum gibiwacu kumae, Giringo i wang’wa, calu ma kwong’ane; kum kumeno wabiringo i wang’gi;

⁷ e wubiai malu ku ka ma wukanu ie adhi, man wubimwonyo adhurane: kum Yehova Mungu mu bimie i cingwu.

⁸ Man ebibedo, kinde ma wumaku adhurane, nia wubiwang’u adhurane ku mac; wubitimo calku lembe pa Yehova: nen, ang’olo iwu.

⁹ Man Yocuwa orogi; e gicidho i ka ma gikanu ie adhi, man gibedo i kind Beth-el ku Ai, yo reto ni Ai: ento Yocuwa gonjo diewor maeca i kind dhanu.

¹⁰ E Yocuwa ai malu pir kugweno, man ecoko dhanu, man eidho malu i Ai, en ku judongo mir Israel, i wang’ dhanu.

¹¹ Man dhanu ceke, ma dhanu mir ali ma gini karacelo kude, giidho malu, man gicoro ceng’ni, e gibino i wang’ adhurane, man gigonjo i ng’et Ai ma yor ariwa ma malu: nwang’u poga ni i kindgi ku Ai.

¹² E egamu dhanu ma yenyo romo rubanga abic, man eketho gikanu adhi i kind Beth-el ku Ai, yo reto ni adhura.

¹³ Kum kumeno giketho dhanu, en e udul ceke ma gini yor ariwa ma malu ni adhura, man dhanu migi ma weg adhi ma gini yo reto ni adhura; man Yocuwa cidho diewor maeca i die poga.

¹⁴ Man etimbre, kinde m’ubimo mi Ai neno maeni, nia gitimo pio man giai pir kugweno, e dhanu mir adhurane giwok woko gikiedo kud Israel, en ku dhanu pare ceke, i nindo ma jung’olo, i wang’ Araba; ento eng’eyo ngo nia jukanu adhi i kume yo ng’ei adhurane.

¹⁵ E Yocuwa kud Israel ceke gitimo calu jusagugi i wang’gi, e giringo yor i yamba.

¹⁶ Man julwong’o dhanu ceke ma ni i adhurane karacelo kara giriem tokgi: e giriemo tok Yocuwa, man jupeyogi cen kud adhurane.

¹⁷ E ng’atu moko mbe m’udong’ i Ai kadi i Beth-el, ma kuwok woko ngo niriemo tok Israel: e giweko adhurane dong’ thwolo, man giriemo tok Israel.

¹⁸ Man Yehova wacu ni Yocuwa kumae, Cim pindo ma ni i cingi yo ba Ai; kum abimiye i cingi. Man Yocuwa cimo pindo ma ni i cinge yo bang’ adhurane.

¹⁹ Man ju m’ukanu adhi giai pio ku ka ma gini i ie, e giringo kinde m’ecimo cinge, man gimondo i adhurane, gimake de; man gitimo pio e gigudo mac kum adhurane.

²⁰ E kinde ma dhanu mi Ai gineno i ng’eigi, gineno, man, nen, yiro mir adhurane winjre malu i polo, e tego migi mbe ma giring ko yo ku kadi yo ku: man dhanu ma giringo i yamba gilokri i kum ju m’ulubo tokgi.

²¹ E kinde ma Yocuwa kud Israel ceke gineno nia ju m’ukanu adhi gimaku adhurane, man nia yiro mir adhurane winjre malu, gilund gilokri kendo, man ginego dhanu mi Ai.

²² Man jumange giai kud i adhurane i kumgi; kum kumeno gini i dier Israel, jumoko ni yo kuni, jumoko ke yo kuca: e gigoyogi, ma giweko ko moko ngo i kindgi m’udong’ kadi m’uboth.

²³ E gimaku ubimo mi Ai ma kwo man gikele ba Yocuwa.

²⁴ Man etimbre, kinde ma Israel gidaru nego dhanu ceke mi Ai i thim, i yamba ka ma giriemogi i ie, man gipodho ceke ku lak palamularu, cil ma ginyothri ko ceke, nia Israel ceke gidwogo ba Ai, man gigoye ku lak palamularu.

²⁵ Man dhanu ceke m’upodho i ceng’ maeca, jumaco ku jumamon, gi rubanga apar wi ario, en e dhanu ceke mi Ai.

²⁶ Kum Yocuwa dolo cinge ngo, m’ecimo ko pindo, cil m’enyotho ko dhanu mi Ai pet.

²⁷ Ndhu lim kud ayeki mir adhura maeca e ma Israel ugamu ni amaci igi gigi, calku lem pa Yehova m’eng’olo ni Yocuwa.

²⁸ Kum kumeno Yocuwa wang’u Ai, man edwoke ni udhuru mi susu mi nja, en e uvuru, cil i ceng’ ma tin.

²⁹ Man eliero ubimo mi Ai wi yen cil uthieno: man ka ceng’ ubepodho Yocuwa ng’olo, man giting’o kume piny ku kum yen, man gibaye i kamondo mi dhugang’ mir adhurane, man edhuro kidi i wie, cil i ceng’ ma tin.

Kieu Lembe mi Cik wi Got Ebal

³⁰ Yocuwa lund uguro pemblam ni Yehova, Mungu mir Israel, i got Ebal,

³¹ calu Musa jatic pa Yehova ng’olo ni nyithindho mir Israel, calu egore i kitabu mi cik pa Musa, pemblam mi kidi ma jutong’o ngo, ma ng’atu moko mbe ma foduting’o nyunyu i wie: man githiero lam m’awang’a i wie ni Yehova, man gilamu lam mi kwiocwiny.

³² Man egoro keca wi kidi wagi cik pa Musa, ma yang’ egoro, i vut njdthindho mir Israel.

³³ E Israel ceke, ku judongo migi ku jego, man jupoklembe migi, gicungo i ng’et sanduk kucel man i ng’ete kucel i wang’ julam ma Julawi, m’uyeyo sanduk mi lembariba pa Yehova, en e jabedo calu ng’atu ma junyolo thugi; ng’etgi kurucel i nyim got Gerizim, man ng’etgi kurucel i wang’ got Ebal; calu Musa ma jatic pa Yehova ng’olo ku kwong’a, nia gimi mugisa ni nyithindho mir Israel.

³⁴ Man yo ng’eye esomo lembe mi cik ceke, mugisa ku kwong’, calku gin ceke m’ugore i kitabu mi cik.

³⁵ Lembe acel de mbe m’udong’ i kind lembe ceke ma Musa ng’olo, ma Yocuwa kusomo ngo i wang’ udul ceke piir Israel, ku mon, man nyithindho ma thindho, man jubedo ma gini i kindgi.