Yocuwa 3 - The Holy Bible In Alur (Lur) Revised Orthography

Israel Ukadhu Yordan

¹ E Yocuwa ai pir kugweno; man giai i Citim, giwok de ba kulo Yordan en ku nyithindho mir Israel ceke; e gigonjo keca ma fodi gikukadhu lokaca ngo.

² E etimbre yo ng’ei ceng’ adek, nia jego kadhu ku kind gonjo;

³ man ging’olo ni dhanu, giwacu kumae, Kinde ma wuneno sanduk mi lembariba pa Yehova Mungu mu, man julam ku Julawi m’uyeye, wubilund ai ku ka ma wubedo i ie, man wubilubo toke.

⁴ Ento kindwu biliero kude, calu bot rubanga ario ku por: kud wubin ceng’ni i kume, kara wung’ei yo ma wubiwotho i ie; kum naka fodi wukadhu kud i yo maeni ngo.

⁵ E Yocuwa wacu ni dhanune kumae, Wudwokru giwu leng’; kum urwo Yehova bitimo gin ma wang’u ijo i kindwu.

⁶ E Yocuwa yero ni julam, ewacu kumae, Wuting’ sanduk mi lembariba, man wukadh lokaca i wang’ dhanu. E giting’o sanduk mi lembariba, man gitelo yo i wang’ dhanune.

⁷ Man Yehova wacu ni Yocuwa kumae, I ceng’ maeni abimaku yungi i wang’ Israel ceke, kara ging’ei nia, calu naka abedo ku Musa, abibedo kudi kumeca.

⁸ E ibing’olo ni julam m’uyeyo sanduk mi lembariba, ibiwacu kumae, Ka wuwok dhu pi mi Yordan, wubicungo ti i Yordan.

⁹ E Yocuwa wacu ni nyithindho mir Israel kumae, Wubin kue, man wuwinj lembe pa Yehova Mungu mu.

¹⁰ Man Yocuwa wacu kumae, Wubing’eyo nia Mungu ma kwo ni i kindwu ni kum maeni, man nia ebiweko riemo Jakanani, man Jahiti, ku Japerizi, man Jagirgaci, ku Jaamori, man Jayebusi woko kud i weng’wu ngo.

¹¹ Nen, sanduk mi lembariba pa Rwoth mi ng’om ngung’ ubekadhu i weng’wu i Yordan.

¹² Ka kumeno kawono wugam dhanu apar wi ario kud i suru mir Israel, ku ba suru ku ba suru ng’atu acel.

¹³ Man ebitimbre, kinde ma die tiend julam m’uyeyo sanduk pa Yehova, ma Rwoth mi ng’om yu, biyom i pi mi Yordan, ya pi mi Yordan bing’oi, en e pi m’uai malu m’uloro piny; e gibicungo ni thuthu acel.

¹⁴ Man etimbre, kinde ma dhanu giai i hema migi, kara gikadh loka Yordan, julam m’uyeyo sanduk mi lembariba ma gini i wang’ dhanu;

¹⁵ man ka ju m’uyeyo sanduk giwok i Yordan, man tiend julam m’uyeyo sanduk umulo dhu pi, (kum Yordan upong’ le le le i nindo mi mwoka ceke),

¹⁶ nia pi m’uai malu loro piny ucungo, man edongo ni thuthu acel, ku bor cen, bang’ Adam, adhura ma i ng’et Zarethan; man maeni m’uloro piny yo ba nam mir Araba, en e Nam Kadu, ung’ol woko ceke: e dhanune kadhu ndhu kum Yeriko.

¹⁷ E julam m’uyeyo sanduk mi lembariba pa Yehova gicungo ki wi ng’om m’uthwo i die Yordan; e Israel ceke kadhu lokaca ku wi ng’om m’uthwo, cil ma thek dho kadhu Yordan ceke.