Yocuwa 23 - The Holy Bible In Alur (Lur) Revised Orthography

Lembe ma Yocuwa Ng’olo ni Juisraeli

¹ Man etimbre yo ng’ei ceng’ dupa, ka Yehova mio yom ni Israel ni judegi migi ceke mi ng’etgi kun ku kun, man Yocuwa ti man oro pare doko dupa;

² nia Yocuwa Lwong’o Israel ceke, en e judongo migi man juwigi, ku jupoklembe migi ku jego migi, man ewacu igi kumae, Ati man oro para doko dit;

³ man wuneno gin ceke ma Yehova Mungu mu timo kum thek maeni ceke piwu; kum Yehova Mungu mu, ekiedo en piwu.

⁴ Nen, aporo iwu thek maeni m’udong’, ubed ni aba ni suru mu, ugambre kulo Yordan, karacelo ku thek ceke m’akabu cen, cil kum nam ma dit yo ku mwonyceng’.

⁵ Man Yehova Mungu mu, ebicwalugi cen kud i weng’wu, man ebiriemogi kud i weng’wu; e wubimwonyo ng’om migi, calu Yehova Mungu mu yero iwu.

⁶ Ka kumeno cwinywu bed tek dit kara wugwok man wutim gin ceke m’ugore i kitabu mi cik pa Musa, kara kud wulokru ku ba lembene yor acwic kadi yor acam;

⁷ kara kud wumond i kind thek maeni, maeni m’udong’ i kindwu; kadok kud wuwec pi nying’ mungu migi, kadi kud wuketh jukwong’ kugi, kadok timo igi de, kadi kud wurum giwu i wang’gi;

⁸ ento wumok kum Yehova Mungu mu, calu wutimo cil i ceng’ maeni.

⁹ Kum Yehova riemo thek ma dwong’ ma tek de woko kud i weng’wu: ento wun, ng’atu moko mbe m’ucungo i weng’wu cu i ceng’ ma tin.

¹⁰ Ng’atu acel m’i kindwu biriemo rubanga; kum Yehova Mungu mu, en e ng’atu m’ukiedo piwu, calu eyero iwu.

¹¹ Ka kumeno wukuru giwu, nia wumar Yehova Mungu mu.

¹² Kadi tek wudok cen moko, man wumoko kum dong’ thek maeni, cil maeni m’udong’ i kindwu, man wugembru kugi man wumond i bang’gi, gin de i beng’wu;

¹³ dong’ wung’ei andha nia Yehova Mungu mu biriemo thek maeni kendo ngo kud i weng’wu; ento gibibedo iwu ni uwic man ngbak, man ukede i ng’etwu man ukudho i Weng’wu, cil ma wunyothru ko woko kud i ng’om maeni ma ber ma Yehova Mungu mu mio iwu.

¹⁴ Man, nen, tin abecidho i yo ma dhanu ceke m’i ng’om cidho i ie: e wung’eyo i adundewu ceke man i ng’eyong’ec mu ceke, nia gin acel de mbe m’urem mi gin ceke ma ber ma Yehova Mungu mu yero piwu; gin ceke timbre kakare iwu, gin acel de mbe i kinde m’urem.

¹⁵ Man ebitimbre, nia calu gin ma ber ceke ma Yehova Mungu mu yero iwu pire uwok i kumwu, e kumeno Yehova bikelo i wiwu gin ma rac ceke, maram enyoth kowu kud i ng’om maeni ma ber ma Yehova Mungu mu mio iwu.

¹⁶ Ka wukadhu ku wi lembariba pa Yehova Mungu mu, m’eng’olo iwu, man wucidho wutimo ni mungu mange, man wurum giwu i bang’gi; e kwinyo pa Yehova bilund opo i kumwu, man wubinyothru pio kud i ng’om ma ber m’emio iwu.