Yocuwa 17 - The Holy Bible In Alur (Lur) Revised Orthography

¹ Man maeni en e gagi m’upodho ni suru pa Manase; kum en e kayu pa Yusuf. Pi Makir ma kayu pa Manase, ma won Gilead, kum en e dhanu mir ali, ka kumeno ebedo ku Gilead ku Bacan.

² Kum kumeno gagi en e pi dong’ nyithindho pa Manase calku wat migi: mi nyithindho pa Abiezer, man mi nyithindho pa Helek, man mi nyithindho pa Asriel, man mi nyithindho pa Cekem, man mi nyithindho pa Hefer, man mi nyithindho pa Cemida: maeni gi nyithindho ma co pa Manase ma wod Yusuf calku wat migi.

³ Ento Zelofehad, ma wod Hefer, ma wod Gilead, ma wod Makir, ma wod Manase, wote mbe, ndhu nyige re: man maeni gi nying’ nyige: Mala, man Noa, man Hogla, ku Milka, man Tirza.

⁴ E gibino ceng’ni i wang’ Eleazar ma jalam, man i wang’ Yocuwa ma wod Nun, man i wang’ judongomawijo, giwacu kumae, Yehova ng’olo ni Musa ya emi iwa aba i kind utumegwa: ka kumeno calku lembang’ola pa Yehova emio igi aba i kind uturneggi pa weggi.

⁵ Man gagi m’upodho ni Manase en e ng’ete apar, umedo ng’om mi Gilead man Bacan, ma en e loka Yordan;

⁶ kum nyig Manase ubedo kud aba i kind wote. Man ng’om Gilead en e piny mi dong’ wot pa Manase.

⁷ Man kieu pa Manase gambre Acer utundo kum Mikmethath ma ni wang’ Cekem; man kieu cidho cil kum cing’ ma yor acwic ba ju m’ubedo i En-tapua.

⁸ Ng’om pa Tapua en e piny pa Manase; ento Tapua i kieu pa Manase en e piny mi nyithindho pa Efraim.

⁹ Man kieu loro kum kulo mi Kana, yor ariwa ma piny ni kulo: adhura maeni gi piny pa Efraim i kind adhura pa Manase: man kieu pa Manase en e yor ariwa ma malu ni kulo, man kawokne en e dhu nam:

¹⁰ yor ariwa ma piny en e pa Efraim, man yor ariwa ma malu en e pa Manase, man nam en e kieune; man gitundo kum Acer yor ariwa ma malu, man kum Isakar yo nyangu.

¹¹ Man Manase bedo ku Beth-cean kud adhurane de, ku Ibleam man adhurane de, ku dhanu mi Dor kud adhurane de, ku dhanu mi En-dor kud adhurane de, man dhanu mi Tanak kud adhurane de, ku dhanu mi Megido man adhurane de, cil ka m’utingre adek, i Isakar man i Acer.

¹² Ento nyithindho pa Manase gicopo riemo dhanu mir adhura maeno woko ngo; ento Jukanani giceri i ng’om maeno.

¹³ Man etimbre, kinde ma nyithindho mir Israel udoko tek, nia giketho Jukanani kum tic ma jumuli ko, e giriemogi woko kot ungo.

¹⁴ Man nyithindho pa Yusuf uyero ni Yocuwa, giwacu kumae, Nedi imio ira gagi acel man makapiny acel kende ni aba, kum nwang’u an a dhanu ma dit, kum naka cil ku kawono Yehova mio mugisa ira?

¹⁵ E Yocuwa wacu igi kumae, Tek in i dhanu ma dit, idh malu kum luli, man itong’ iri giri keca i ng’om mi Juperizi man mi Jurefaim; kum ng’om gudi pa Efraim e diny hai iri.

¹⁶ E nyithindho pa Yusuf giwacu kumae, Ng’om gudi eromowa ngo: man Jukanani ceke m’ubedo i ng’om poga gi weg magali mi nyunyu, ju ma ni i Beth-cean ku ma ni i adhurane bende, man ju ma ni i poga mi Yezrel de.

¹⁷ Man Yocuwa yero ni ot pa Yusuf en e ni Efraim man ni Manase, ewacu kumae, In i dhanu ma dit, man tego peri dit; ibibedo ku gagi acel kende ngo:

¹⁸ ento ng’om gudi bibedo peri; kum kadok en e luli, ibitong’e piny, man kawokne bibedo peri; kum ibiriemo Jukanani woko, kadok gi weg magali mi nyunyu, man kadok gi tek de.