Yocuwa 13 - The Holy Bible In Alur (Lur) Revised Orthography

Ng’om ma Fodi Gimaku Ngo

¹ Nwang’u Yocuwa ti man rundi pare doko dit; man Yehova wacu ire kumae, Iti man rundi peri doko dit, e ng’om ma fodi dong’ e dit hai mir amwonya.

² Maeni en e ng’om ma fodi dong’: ng’et ng’om ceke mi Jufilisti, man Jugecuri ceke;

³ ugambre kum Cihor, ma en e i wang’ Misiri, cil kum kieu mir Ekron yor ariwa ma malu, ng’om ma jukwane ni Jukanani; man rwodhi abic mi Jufilisti; en e Jugazi, man Juacdodi ku Juackeloni, man Jugiti, ku Juekroni; ku Juavi bende,

⁴ yor ariwa ma piny; ng’om ceke mi Jukanani man Meara ma piny mi Jusidoni, cil kum Afek, cik kum kieu mi Juamori;

⁵ man ng’om mi Jugebali, ku Lebanon ceke, yo ba wokceng’, ugambre Bal-gad the got Hermon cil kum kamondo mi Hamath;

⁶ ju m’ubedo i ng’om gudi ceke ugambre Lebanon cil kum Misrefothmaim, en e Jusidoni ceke; joni abiriemo woko i wang’ nyithindho mir Israel: ento dong’ imie ni Israel ni aba, calu ang’olo iri.

⁷ Ka kumeno kawono pok ng’om maeni ni aba ni suru abung’wen, ku ng’et suru pa Manase.

Aba pa Manase, Ruben ku Gad

⁸ Karacelo kude Jurubeni ku Jugadi gimaku aba migi, ma Musa mio igi, loka Yordan yo nyangu, cil calu Musa ma jatic pa Yehova mio igi:

⁹ ugambre Aroer, ma en e dhu poga mir Amon, kud adhura ma ni i die poga, man ng’om pambu ceke mi Medeba cil kum Dibon;

¹⁰ kud adhura ceke pa Sihon m’ubimo mi Juamori, m’ucamu ker i Hecbon, cil kum kieu mi nyithindho mir Amon;

¹¹ man Gilead, ku kieu mi Jugecuri man Jumakathi, ku got Hermon ceke, man Bacan ceke cil kum Saleka;

¹² ker ceke pa Og i Bacan, m’ucamu ker i Actaroth man i Edrei (ma en e ju m’udong’ mi dong’ Jurefaim); kum Musa goyo joni, man eriemogi woko.

¹³ Ento nyithindho mir Israel uriemo Jugecuri woko ngo, kadi Jumakathi de: ento Gecur ku Makath gibedo i dier Israel cil i ceng’ ma tin.

¹⁴ Ndhu ni suru pa Lawi emio aba moko ngo; girathiera pa Yehova, Mungu mir Israel, ma jutimo ku mac gin gi aba pare, calu eyero ire.

¹⁵ Man Musa mio ni suru mi nyithindho pa Ruben calku wat migi.

¹⁶ Man kieu migi gambre Aroer, ma en e dhu poga mir Amon, man adhura ma ni i die poga, ku pambu ceke ma ceng’ni Medeba;

¹⁷ man Hecbon, kud adhurane ceke ma gini i pambu: man Dibon, ku Bamoth-bal, man Beth-bal-meon,

¹⁸ man Yahaz, ku Kedemoth, man Mefath,

¹⁹ man Kiriathaim, ku Sibma, man Zereth-cahar i got mi poga,

²⁰ man Beth-peor, ku ng’om m’alora mi Pisga, man Beth-yecimoth,

²¹ kud adhura ceke mi pambu, man ker ceke pa Sihon m’ubimo mi Juamori, m’ucamu ker i Hecbon, ma Musa goyo karacelo ku rwodhi mi Midian, ma gi eni: Evi, man Rekem, ku Zur, man Hur, ku Reba, gi judongomawijo pa Sihon, m’ubedo i ng’ombe.

²² Balam bende ma wod Beor, ma jabila, nyithindho mir Israel ginego ku palamularu i kind dong’ dhanu ma junego.

²³ Man kieu mi nyithindho pa Ruben en e Yordan, ku kieune de. Maeni en e aba mi nyithindho pa Ruben calku wat migi, adhura ku pacune de.

²⁴ Man Musa mio ni suru pa Gad, ni nyithindho pa Gad, calku wat migi.

²⁵ Man kieu migi en e Yazer, kud adhura ceke mi Gilead, ku ng’et ng’om mi nyithindho mir Amon, cil kum Aroer ma ni i wang’ Raba;

²⁶ man ugambre Hecbon cil kum Ramath-mizpa ku Betonim; man ugambre Mahanaim cil kum kieu mi Debir;

²⁷ man i poga, Beth-haram, man Beth-nimra, man Sukoth, ku Zafon, dong’ ker pa Sihon m’ubimo mi Hecbon, ku Yordan man kieune, cil kum ng’et nam Cinereth ma wi tung loka Yordan yo nyangu.

²⁸ Maeni en e aba mi nyithindho pa Gad calku wat migi, adhura ku pacune.

²⁹ Man Musa mio aba ni ng’et suru pa Manase: man en e pi ng’et suru mi nyithindho pa Manase calku wat migi.

³⁰ Man kieu migi gambre kum Mahanaim, ku Bacan ceke, man ker ceke pa Og m’ubimo mi Bacan, man adhura ceke pa Yair, ma gini i Bacan, adhura pier abusiel:

³¹ man ng’et Gilead, ku Actaroth, man Edrei, adhura mi ker pa Og i Bacan, en e mi nyithindho pa Makir ma wod Manase, en e mi ng’et nyithindho pa Makir calku wat migi.

³² Maeni gin aba ma Musa poko i pambu mi Moab, loka Yordan i Yeriko, yo nyangu.

³³ Ento Musa mio aba moko ngo ni suru pa Lawi: Yehova, Mungu mir Israel, en e aba migi, calu eyero igi.