Yocuwa 11 - The Holy Bible In Alur (Lur) Revised Orthography

Juloyo Jabin ku Ju ma Giribri Kugi

¹ Man etimbre, kinde ma Jabin m’ubimo mi Hazor uwinjo pi maeni, nia eoro kwenda ba Yobab m’ubimo mi Madon, man bang’ ubimo mi Cimron, man bang’ ubimo mi Akcaf,

² man ba ju m’ubimo ma gini yor ariwa ma malu, i ng’om gudi, man i ng’om mir Araba ma yor ariwa ma piny ni Cineroth, man i ng’om poga, kud i ng’om m’utingre mi Dor yo reto,

³ man ba Jakanani yo nyangu ku yo reto, man ba Jaamori, ku Jahiti, man Japerizi, ku Jayebusi i ng’om gudi, man Jahivi the got Hermon i ng’om mi Mizpa.

⁴ Man gicidho woko, gin kud udul migi ceke karacelo kugi, dhanu dupa, cil calu kwio ma dhu nam ni udulgi, karacelo ku riuni man magali dupa dupa.

⁵ Man ubimo maeni ceke gicokri karacelo; e gibino gigonjo karacelo ba pi mi Merom, kara gikied ku Israel.

⁶ E Yehova wacu ni Yocuwa kumae, Lworo kud unegi i kumgi; kum urwo unyoni abimiogi ceke ma junego gi i wang’ Israel: ibitong’o ler riuni migi, man ibiwang’u magali migi ku mac.

⁷ Kum kumeno Yocuwa bino, man dhanu mir ali ceke gikugi, i kumgi ba pi mi Merom mwom, e gipodho i wigi.

⁸ Man Yehova miogi i cing’ Israel, e gigoyogi, man giriemogi cil kum Sidon ma dit, man cil kum Misrefothmaim, man cil kum poga mi Mizpa yo nyangu; e gigoyogi, cil ma giweko igi jumoko ngo m’udong’.

⁹ E Yocuwa timo i kumgi calu Yehova wacu ire: etong’o ler riuni migi, man ewang’u magali migi ku mac.

¹⁰ Man Yocuwa lokre cen i nindo maeca, man emaku Hazor, man egoyo ubimone ku palamularu: kum naka Hazor en e wie mi ker maeno ceke.

¹¹ E gigoyo ng’eyong’ec ceke ma gini i ie ku lak palamularu, ma ginyotho kogi kot; moko mbe m’udong’ ma yuyo: e ewang’u Hazor ku mac.

¹² Man adhura ceke mir ubimo maeno, kud ubimone ceke, Yocuwa maku, man egoyogi ku lak palamularu, man enyothogi pet; calu Musa ma jatic pa Yehova ng’olo.

¹³ Ento pir adhura m’ucungo wi ungulu gudi migi, Israel uwang’u kindgi moko ngo, ndhu Hazor kende; maeno Yocuwa wang’u.

¹⁴ Man ayeki ceke mir adhura maeno, ku lim, nyithindho mir Israel umaku ni amaci igi gigi; ento dhanu kubang’gi kubadg’gi gigoyo ku lak palamularu, cil ma ginyotho kogi kot, kadok aweka de giweko ng’atu moko ngo ma yuyo.

¹⁵ Calu Yehova ng’olo ni Musa ma jatic pare, e Musa ng’olo ni Yocuwa kumeca: man Yocuwa timo kumeca; eweko gin moko ngo ma fokutimbre ngo ni gin ceke ma Mungu ng’olo ni Musa.

Yocuwa Maku Ng’ombe Ceke

¹⁶ Kum kumeno Yocuwa maku ng’om maeno ceke, en e ng’om gudi, ku ng’om ceke ma yor ariwa ma piny, man ng’om ceke mi Gocen, ku ng’om poga, man ng’om mir Araba, ku ng’om gudi mir Israel, man poga mi ng’ombe;

¹⁷ ugambre kum got Halak, m’uidho malu kum Seir, cil kum Bal-gad i poga mi Lebanon the got Hermon: man emaku ubimo migi ceke, egoyogi de, man enegogi.

¹⁸ Yocuwa timo ali nindo dupa kud ubimo maeno ceke.

¹⁹ Adhura moko mbe m’utimo kwiocwiny ku nyithindho mir Israel, ndhu Juhivi ma dhanu m’ubedo i Gibeon: gimaku ceke i ali.

²⁰ Kum Yehova dwoko adundegi nwang’, kara gibin kum Israel i lwiny, kara enyothgi kot, kara ku ginwang’ bero, ento kara enyothgi, calu Yehova ng’olo ni Musa.

²¹ E Yocuwa bino i nindo maeca, man ekabu Juanaki woko kud i ng’om gudi, kud i Hebron, kud i Debir, kud i Anab, man kud i ng’om gudi ceke mi Yuda, man kud i ng’om gudi ceke mir Israel: Yocuwa nyothogi pet karacelo kud adhura migi.

²² Juanaki moko mbe m’udong’ i ng’om mi njdthindho mir Israel: ndhu i Gaza, man i Gath, ku i Acdod, e ma moko dong’.

²³ Kum kumeno Yocuwa maku ng’ombe ceke, calku gin ceke ma Yehova yero ni Musa; e Yocuwa mie ni Israel ni aba calku pok migi ku suru migi. E ng’ombe kwio ni lwiny.