Yeremia 6 - The Holy Bible In Alur (Lur) Revised Orthography

Nyoth ma Dit wi Yerusalem ku Yuda

¹ Wuring kara wubothi, wu nyithindho pa Benyamin, kud i die Yerusalem, man wukudh agwara i Tekoa, wuting’ lembanyutha de wi Beth-hakerem; kum lem ma rac uneno ku yor ariwa ma malu, ku nyoth ma dit.

² Ng’atu ma ber ma yom de, en e Nyasayuni, abikabu woko.

³ Jukwac kud udul migi bibino i bang’e; gibiguro hema migi i kume gbur; gibicamu kubang’gi kubang’gi ng’atuman i kakare.

⁴ Wuyik ali i kume; wuai, man wek waidhu malu dieceng’. Can i wiwa! kum ceng’ uvoc, kum tipopiny mir uthieno umo piny.

⁵ Wuai, man wek waidhu malu ku diewor, man wek wanyothu udi ma beco pare.

⁶ Kum Yehova mir udul uwacu kumae, Wung’ol yedhi piny, man wudhur ng’om kum Yerusalem: maeni adhura mi lieu; en e rop alikali i kinde.

⁷ Calu pi m’atong’a wodho pige woko, ewodho dubo pare woko kumeca: rop ku nyoth winjre i ie; remokum ku lero ni i wang’a thiri thiri.

⁸ Winj ponji, E Yerusalem, ng’eyong’ec para maru koc kudi; amaru dwoki ni uvuru, ni ng’om ma jubedo i ie ngo.

⁹ Yehova mir udid uwacu kumae, Gibibeko kund Israel mii calu ulok: lok cingi kendo calu japon nyingulok i katoko.

¹⁰ Abiyero man abituco ni ng’a, kara giwinji? nen, ithgi ju yaa ngo, e gicopo winjo ngo: nen, lembe pa Yehova doko igi ni cac; anyong’a negogi ngo i ie.

¹¹ Ka kumeno apong’ ku kwinyo pa Yehova; aol ku ciro lembe: konje woko wi nyithindho ni gengi, man wi cokri mi dhanu m’aradu karacelo; kum jubimaku cil nico karacelo ku dhaku, jadit karacelo ku ng’atu ma nindo pare pong’o.

¹² Man jubiloko udigi ni jumange, pothi migi ku mon migi de karacelo; kum abirieyo cinga wi ju m’ubedo wi ng’om, Yehova wacu.

¹³ Kum ugambre kum ma nok m’i kindgi cil kum ma dit m’i kindgi kubang’gi kubang’gi ng’atuman uketho cwinye hai kum piny; man ugambre kum jabila cil kum jalam ku ba dhanu ku ba dhanu ng’atuman timo ku ndra.

¹⁴ Gicangu rem mi dhanu para bende nyanok, giwacu kumae, Kwiocwiny, kwiocwiny; kinde ma kwiocwiny moko mbe.

¹⁵ Lewic unegogi kinde ma gitimo ginmajudagu? ungo, lewic negogi ki ngo, kadok wang’gi de copo lokre ngo: ka kumeno gibipodho i kind ju m’upodho; i nindo m’aliewogi jubiredhogi piny, Yehova wacu.

¹⁶ Yehova wacu kumae, Wucung i yo man wunen, wupenj de pi yo ma con, ma yo ma ber ni i ie; man wuwoth i ie, e wubinwang’u yom ni ng’eyong’ec mu: ento giwacu kumae, Wabiwotho i ie ngo.

¹⁷ E aketho jukur i wiwu, m’uwacu kumae, Wuwinj badwand agwara; ento giwacu kumae, Wabiwinjo ngo.

¹⁸ Ka kumeno wuwinji, wu thek, man wung’ei, E cokri, gin ma ni i kindgi.

¹⁹ Winji, E ng’om: nen, abikelo lem ma rac wi dhanu maeni, en e nying’ mi pidoic migi, kum giwinjo lembe para ngo; man cik para, gikwere.

²⁰ Udok ma ng’wice ng’ar ubino i bang’a m’uai i Ceba pirang’o, ku thiang’ kud i ng’om ma bon? Lam m’awang’a mu yire ngo, kadi lam mu de nyayu mutoro i ia ngo.

²¹ Ka kumeno Yehova wacu kumae, Nen, abiketho ginmaredhojo i wang’ dhanu maeni; e wego ku wodo gibikier i kumgi karacelo; wat ku jarimbe birwinyo.

²² Yehova wacu kumae, Nen dhanu ai i ng’om ma yor ariwa ma malu; man jubithubo thek ma dit ugambre wi ng’et ng’om ma wi tung’.

²³ Gimaku atum ku tong’; gi kwiny, man kisa mbe kugi; dwandgi woi calu nam, man giwotho ku wi riuni, dhanu ceke kubang’gi kubang’gi githero, calu dhanu m’ubecidho i lwiny, i kumi, E Nyasayuni.

²⁴ Wawinjo rwonge; cingwa kwio: ndiba makuwa, man remokum calu dhaku m’ubenyol.

²⁵ Kud iwok woko i thim, kadi kud iwoth dhu yo; kum palamularu pa jadegi, man ndiri, gini kun ku kun ceke.

²⁶ E nyar dhanu para, twiri ku gonia, man inyembri i vuru: tim iri ywak, calu pi wod kulong’, goi nduru ma kec hai; kum janyoth bibino pio i kumwa.

²⁷ Atimi ni mbegi man ni ot ma tek i kind dhanu para; kara ing’ei man iponj yo migi.

²⁸ Kagi ceke gi jujai ma rac, man gibecidho kun ku kun ku yero nying’; gi mola man nyunyu: kagi ceke gitimo mi nyoth.

²⁹ Adila vuko ma tek; nying atum uwang’ i mac: gicikulonyo mananu; kum jukabu judubo cen ungo.

³⁰ Dhanu bilwong’ogi usau mola ma tar, kum Yehova kwerogi.