Yeremia 5 - The Holy Bible In Alur (Lur) Revised Orthography

Dubo mi Yerusalem ku Yuda

¹ Wuring kun ku kun kud i gengi mi Yerusalem, man wunen kawono, wung’ei de, man wuyeny i ka ma lacne, tek wucopo nwang’u dhanu, tek ng’atu moko nuti ma timo pwe, m’uyenyo lemandha; e abiweko ire woko.

² Man kadok giwacu kumae, Calu Yehova bedo kwo; andha gikwong’o mi ndra.

³ E Yehova, weng’i neno wi lemandha ngo? igoyogi, ento can unegogi ngo; idarugi, ento gikwero jolo ponji: gidwoko wang’gi tek ma sagu cana; gikwero dwogo.

⁴ Alund awacu kumae, Andha maeni gi jucan; gi jukusegu; kum ging’eyo yo pa Yehova ngo, kadi cik pa Mungu migi:

⁵ abicidho ba dhanu ma dongo, man abiweco i bang’gi; kum ging’eyo yo pa Yehova, ku pokolembe pa Mungu migi. Ento maeni gituro mberembere, man gicodo twic ku cwinygi acel.

⁶ Kum kumeno umvor m’uai i luli binegogi, urudi mir uthieno binyothogi, ng’u bipondo kum adhura migi; ku ba dhanu ceke m’uwok woko ku kuca gibiyeco nziki nziki; kum gondri migi gi dupa, man corocen migi nyai.

⁷ Acopo weko iri nenedi? nyithindho peri giweka, man gikwong’o ku gin ma mungu ngo. Kinde m’ayeng’ogi, gidubri swa, man gicokri gigi ni udul i udi mi weg asara;

⁸ gibedo calu riuni ma jukaku ku cam m’uwotho swa; kubang’gi kubang’gi ng’atuman uywak tok dhaku pa wadi.

⁹ Abiliewo ngo kum gin maeni? Yehova wacu; man jubiculo ng’eyong’ec para ngo kum wadi thek ma calu maeni?

¹⁰ Wuidh malu wi gang’kidi pare, man wunyothi; ento kud wujig ma gwei: wukab jange cen; kum gi pa Yehova ngo.

¹¹ Kum ot mir Israel ku ot pa Yuda gitimo kud abombi dit i kuma, Yehova wacu.

¹² Gikwero Yehova, man giwacu kumae, En e en ungo; kadok lem ma rac de biwok i kmnwa ngo; kadok palamularu de kadi ndru de wabineno ngo:

¹³ man jubila bidoko ni yamu, man lembe ni i igi ngo: jubitimo kumeni i kumgi.

¹⁴ Kum kumeno Yehova, Mungu mir udul, uwacu kumae, Kum wuyero lembe maeni, nen, abiketho lembe para bedo ni mac i dhogi, man dhanu maeni ni yen, e ebiwang’ugi.

¹⁵ Nen, abikelo thek i wiwu ku bor, E ot mir Israel, Yehova wacu: en e thek ma tek, en e thek ma con, thek ma dhokne ing’eyo ngo, kadok gin ma giweco de ing’eyo ngo.

¹⁶ Tubu migi en e odliel ma thwolo, kagi ceke gi dhanu ma jutego.

¹⁷ Man gibicamu mwoka peri, ku kwen peri, ma maku woti ku nyigi gicam; gibicamu udul rombe peri ku dhok peri; gibicamu ulok peri ku yendubolo peri; gibirwombo adhura ma tek peri piny, m’igeno, ku palamularu.

¹⁸ Ento cil i ceng’ maeca, Yehova wacu, abijigowu ma gwei ungo.

¹⁹ Man ebitimbre, kinde ma wuwacu kumae, Pirang’o Yehova Mungu mwa timo gin maeni ceke i kumwa? ibilund wacu igi kumae, Calu wtiweka, man wutimo ni mungu ma wi rok i ng’om mu, wubitimo ni juwirok i ng’om ma en e mu ngo kumeca.

²⁰ Wuyer maeni i ot pa Yakobo, man wurwei maeni i Yuda, wuwac kumae,

²¹ Kawono wuwinj maeni, E wu dhanu ma jukusegu, man ma ng’eyong’ec umbe kudu; ma wubedo ku wang’, e wuneno ngo; ma wubedo ku ith, e wuwinjo ngo:

²² Wulwora ngo? Yehova wacu: kumwu bimiel ungo i wang’a m’aketho kwio ni kieu mi nam, ku cik mi nja, kara kud ekadhi? man kadok mukurane thore, ento gicopo sagu ngo; kadok giwoi, ento gicopo kadhe ngo.

²³ Ento dhanu maeni bedo kud adunde mi jai man mi co; gijai e gicidho.

²⁴ Kadok yor i adundegi de giwacu ngo kumae, Kawono wek walwor Yehova Mungu mwa, m’umio koth ma kwong’a ku ma cen de, i nindone; m’ugwoko iwa yenga m’aketha mi mwoka.

²⁵ Kier mu loko maeni cen, man dubo mu cero gin ma ber iwu.

²⁶ Kum dhanu ma rac unwangre i kind dhanu para: gikio, calu jumak winyo pondo; giciko ngbak, gimaku dhanu.

²⁷ Calu odwinyo pong’ ku winyo, udi migi pong’ kud abombi kumeca: ka kumeno gidoko dit, gilony de.

²⁸ Gicwe, girieny: eyo, gisagri i giratima mi dubo; gicungo kum lembe ngo, lembe mi kic, kara lembe migi bed miero; man gipoko lembe pwe ngo ni jucanpiny.

²⁹ E abiliewo ngo pi gin maeni? Yehova wacu; jubiculo ni ng’eyong’ec para ngo kum wadi thek ma calu maeni?

³⁰ Gin ma wang’u ic man ma rac utimbre i ng’om:

³¹ jubila giewo ku ndra, man julam ubimo ni kum piny migi; e dhanu para gimaru ebed kumeno: e wubitimo ang’o i kajikne?