Biblia Todo Logo
Bìoball air-loidhne

- Sanasan -

Yeremia 41 - The Holy Bible In Alur (Lur) Revised Orthography

1 Nie etimbre i dwi mir abirone, nia Icmael ma wod Nethania, ma wod Elicama, mi kodhi ker ku jego ma dit acel mir ubimo, man dhanu apar gi kude, gibino ba Gedalia ma wod Ahikam i Mizpa; e gicamu kwen karacelo kuca i Mizpa.

2 Icmael ma wod Nethania, ku dhanu apar ma ni kude, gilund giai malu man gigoyo Gedalia ma wod Ahikam ma wod Cafan ku palamularu, man enege, m’ubimo mi Babeli ketho ni jabim wi ng’ombe.

3 Icmael unego Juyahudi ceke bende ma gini kude, ma gini karacelo ku Gedalia, i Mizpa, ku Jukaldayo ma junwang’u kuca, ma dhanu mir ali.

4 Man etimbre i ceng’ mir arionde yo ng’ei Gedalia m’enego, man ng’atu moko mbe m’ung’eyo,

5 nia dhanu bino m’uai Cekem, man kud i Cilo, man kud i Samaria, en e dhanu pier abora, ma tikgi bedo aliela kendi migi de bedo ayeca, man ma githumbri gigi, ku lam mi mogo man udok ma ng’wice ng’ar i cing’gi, kara gikelgi ba ot pa Yehova.

6 Man Icmael ma wod Nethania uwok woko kud i Mizpa kara giromb kugi, m’ewotho ku ywak kan ebecidho: man etimbre, kinde m’erombo kugi, ewacu igi kumae, Wubin ba Gedalia ma wod Ahikam.

7 Man etimbre, kinde ma giwok i dier adhura, nia Icmael ma wod Nethania negogi, man ebayugi i die vur, en, ku dhanu ma ni kude.

8 Ento dhanu apar unwangre i kindgi m’uwacu ni Icmael kumae, Kud inegwa; kum wabedo ku piny m’akana m’upondo i thim, mi nganu, man mi nganu ma tung’, man mi mo, man mi kic. Kum kumeno ewekogi, man enegogi ngo kind utumeggi.

9 Nwang’u vur ma Icmael ubayu ie avuj dhanu ceke m’enego, i vut Gedalia (vuje en e ma Asa m’ubimo timo ni lworo pa Baca m’ubimo mir Israel), Icmael ma wod Nethania pong’e ku ju ma junego.

10 Icmael ulund utero dong’ dhanu ceke ma ni i Mizpa ni ng’eca, cil nyig ubimo, ku dhanu ceke m’udong’ i Mizpa, ma Nebuzaradan ma jego mi jukur uketho i cing’ Gedalia ma wod Ahikam; Icmael ma wod Nethania terogi i ng’eca, man eai kara ekadh lokaca ba nyithindho mir Amon.

11 Ento kinde ma Yohanan ma wod Kareya, ku jego ceke mi njuru asikari ma ni kude, uwinjo lem ma rac ceke ma Icmael ma wod Nethania timo,

12 gilund gicamit dhanu ceke, man gicidho kara gikied ku Icmael ma wod Nethania, man ginwyng’e dim pi ma di: ma ni i Gibeon.

13 Nie etimbre nia kinde ma dhanu ceke ma gini karacelo ku Icmael uneno Yohanan ma wod Kareya, ku jego ceke mi niuru asikari ma ni kude, anyoag’a lund unegogi,

14 Kum kumeno dhanu ceke ma Icmael uyaku ni ng’eca kud i Mizpa gilokri man gidwogo, man gicidho ba Yohanan ma wod Kareya.

15 Ento Icmael ma wod Nethania both ni Yohanan ku dhanu abora, e ecidho ba nyithindho mir Amon.

16 Yohanan ma wod Kareya, ku jego ceke mi njuru asikari ma ni kude, gilund gigamu dong’ dhanu ceke m’egamu ku ba Icmael ma wod Nethania, kud i Mizpa, yo ng’ei Gedalia ma wod Ahikam m’enego, en e dhanu mir ali, ku mon, man nyithindho, ku jumugumba, m’edwogo kudo kud i Gibeon.

17 E giai, man gibedo i Geruth Kimham, ma ni i vut Beth-lehem, kara gici gimond i Misiri,

18 ni kum Jukaldayo; kum gilworogi, kum Icmael ma wod Nethania nego Gedalia ma wod Ahikam, m’ubimo mi Babeli ketho ni jabim wi ng’ombe.

The Holy Bible In Alur (Lur), Revised Orthography © United Bible Societies, 1970.

Bible Society of the Democratic Republic of Congo
Lean sinn:



Sanasan