Yeremia 4 - The Holy Bible In Alur (Lur) Revised Orthography

¹ Tek ibidwogo, E Israel, Yehova wacu, tek ibidwogo i bang’a, man tek ibicoro ginmajudagu peri kud i wang’a; jubilund dakuwu ngo;

² man ibikwong’o kwong’ kumae, Calu Yehova bedo kwo, i lemandha, i pokolembe, man i bedopwe; man thek bimio mugisa igi gigi ni kume, man gibiluli ni kume.

³ Kum Yehova wacu kumae ni dhanu mi Yuda man ni Yerusalem, Wufur ukang’ mu, man kud wucoi kind ukudho.

⁴ Wutim yaa i kumwu giwu ni Yehova, man wukab dendkum mi kumwu cen ku i adundewu, wu dhanu mi Yuda man ju m’ubedo i Yerusalem; kwinyo para maru wok woko calu mac, man emaru wang’ ketho nia ng’atu moko copo nege ngo, kum dubo mi giratima mu.

Jatwong’o Israel pi Lwiny ma Bibino i Wigi

⁵ Wuyer ni Yuda, man wurwei i Yerusalem; man wuwackumae, Wukudh agwara i ng’oni: wukok ma tek man wuwac kumae, Wucokru giwu, man wuwek wamond i adhura ma tek.

⁶ Wuketh abera yo ha Sayuni: waring mi both, kud wubedi; kum abikelo lem ma rac ku yor ariwn ma main, man nyoth ma dit.

⁷ Umvor uai malu kud i susu m’i luli pare, man janyoth mi thek; eni i yo pare, eai kud i kakare kara edwok ng’om pari ni uvuru kara judwok adhura peri ni uvuru, ma dhanu mbe i ie.

⁸ Kum maeni wutwiru ku goniu, wuywak man wugoi nduru; kum ng’ecwiny ma lake tek pa Yehova lokre cen ungo kud i kurawa.

⁹ Man ebitimbre i ceng’ maeca. Yehova wacu, nia adunde ubimo birwinyo, man adunde judongomawiio: julam igi biwang’ lii, man jubila igi biwang’ lii.

¹⁰ Alund awacu kumae, A. Rwoth Yehova! andha ibombo dhanu maeni dit ku Yerusalem, m’iwacu kumae, Wubibedo ku kwiocwiny; ento palamularu tundo kum kwo.

¹¹ I nindo maeca jubiwacu ni dhanu maeni man ni Yerusalem kumae, Yamu ma lieth m’uai i ka m’utingre ma lelele i langa yo ba nyar dhanu para, mi kworo ngo, kadi mi lilo de ngo;

¹² yamu ma tek usagu pi maeni bibino ira: kawono an bende abiweco lembapoka i kumgi.

¹³ Nen, ebiidho malu calu afuru, man magali pare bibedo calu atido: riuni pare gi jung’wec ma sagu acur. Can i wiwa! kum wanyothra.

¹⁴ E Yerusalem, lwok adundeni ni dubo, kara ibothi. Pidoic peri ma rac bibedo yor ii rokani?

¹⁵ Kum dwal uyero ugambre Dan, man erweyo lem ma rac ugambre kum ungulu gudi pa Efraim.

¹⁶ Wuyer ni thek; nen, wurwei lembe kum Yerusalem, nia julib uai i ng’om ma bor, man gi wodho dwandgi kum adhura mi Yuda.

¹⁷ Gitieke gbur calu jukur podho, kum ejai ira, Yehova wacu.

¹⁸ Yo peri ku giratima peri limo gin maeni iri: maeni dubo peri; kum en e kec, kum etundo kum adundeni.

¹⁹ Ndiba para, ndiba para mire! can unega cil i adundena; cwinya ng’abre yor i ia; acopo ling’ ungo; kum iwinjo, E ng’eyong’ec para, badwal mir agwara, en e jampoi mir ali.

²⁰ Jukok pi nyoth wi nyoth; kum judwoko ng’om dho ni uvuru: hema para nyothre pio, man bongu m’ang’aba para i nindo ma nyagwil.

²¹ Abineno abera rokani, man abiwinjo badwal mir agwara rokani?

²² Kum dhanu para gi jukusegu, ging’eya ngo; gi nyithindho ma wigi tek, ng’eyothelembe mbe kugi; gi riek mi timo rac, ento ng’eyong’ec mi timo ber umbe kugi.

²³ Aneno ng’om, man, nen, ebedo ni uvuru man ayine mbe; man polo, e der umbe kugi.

²⁴ Aneno gudi, man, nen, giyengri, man ungulu gudi ceke wiri rr.

²⁵ Aneno, man, nen, ng’atu moko mbe, man winyo ceke m’i polo ringo.

²⁶ Aneno, man, nen, podho ma cek hai en e langa, man adhurane ceke jurwombo piny i vut Yehova, man i wang’ ng’ecwiny pare ma lake tek.

²⁷ Kum Yehova wacu kumae, Ng’om dho bibedo ni uvuru; ento abijigo ma gwei ngo.

²⁸ Pi maeni ng’om biywak, man polo ma malu bibedo col; kum ayero maeni, akeco maeni, e aloko cwinya ngo, kadi abilokra cen de ngo ni maeni.

²⁹ Adhura ceke kubang’e kubang’e giringo ni badwal mi weg riuni ku weg atum; gimondo i susu m’i luli, man giidho malu wi cana: giweko adhura kubang’e kubang’e, man ng’atu moko mbe m’ubedo i ie.

³⁰ Man in, kinde ma judwoki ni uvuru, ibitimo ang’o? Kadok ironjri giri ku kwar ngbo kadok irukri ku jambruko mi mola ma kwar, kadok idwoko weng’i dit kum giramwona, idwokri giri ber mananu; jumer peri gicei, giyenyo kwo peri.

³¹ Kum awinjo dwal calu pa dhaku m’ubenyol, ndiba calu pa ng’atu m’ubenyolo nyathin pare ma kayu, en e dwal pa Nyasayuni, m’uyuyo kara eyui, m’uthang’u cinge, m’uwacu kumae, Can i wia kawono mire! kum ng’eyong’ec para voc i wang’ junek.