Yeremia 25 - The Holy Bible In Alur (Lur) Revised Orthography

Ng’om Ubedo ni Uvuru Oro Pier Abiro ni kum Babeli

¹ Lembe m’ubino ba Yeremia pi dhanu ceke mi Yuda, i rundi mir ang’wende pa Yehoiakim ma wod Yosia, m’ubimo mi Yuda (ma en e rundi ma kwong’ane pa Nebukadrezar m’ubimo mi Babeli),

² ma Yeremia ma jabila yero ni dhanu ceke mi Yuda, man ni dhanu m’ubedo i Yerusalem ceke, ewacu kumae:

³ Ugambre i rundi apar wi adege pa Yosia ma wod Amon, m’ubimo mi Yuda, cil i ceng’ maeni, rundi pier ario wi adek maeni, lembe pa Yehova bino i bang’a, man ayero iwu, m’aai pir man ayero; ento wuwinjo ngo.

⁴ Man Yehova oro jutic pare ceke ma jubila i beng’wu, m’eai pir man eorogi (ento wuwinjo ngo, kadi ithwu de wuciko ngo mi winjo),

⁵ ma giwacu kumae, Wudwog kawono kubeng’wu kubeng’wu ng’atuman kud i yo pare ma rac, man ku ba giratima mu ma rac, man wubed i ng’om ma Yehova mio iwu man ni kwaruwu, ugambre con cil nja de;

⁶ man kud wulub tok mungu mange kara wutim igi, man kara wurwo igi, man kud wunyai ng’ecwiny i ia ku tic mi cingwu; e abitimowu rac ungo.

⁷ Ento wuwinja ngo, Yehova wacu; kara wunyai ng’ecwiny i ia ku tic m’i cingwu ni rac mu giwu.

⁸ Ka kumeno Yehova mir udul uwacu kumae: Kum wuwinjo lembe para ngo,

⁹ nen, abioro man abigamu wat ceke ma yor ariwa ma malu, Yehova wacu, man abioro kwenda ba Nebukadrezar m’ubimo mi Babeli, ma jatic para, man abikelogi kum ng’om maeni, man kum ju m’ubedo iiene de, man kum thek maeni ceke kingli; man abinyothogi kot, e abidwokogi ni wang’uic, ku cac, man ni uvuru ma gwei.

¹⁰ Mange ke abikabu dwal mir anyong’a ku dwal mi mutoro, dwand won ambadha, man dwand mugole, ku badwal mi kidi rego, man der mi thala kud i bang’gi.

¹¹ Man ng’om maeni dho bibedo ni uvuru, man ni wang’uic; man thek maeni bitimo ni ubimo mi Babeli rundi pier abiro.

¹² Man ebitimbre, kinde ma rundi pier abiro thum, nia abisendo ubimo mi Babeli, ku thek maeno, Yehova wacu, kum kier migi, man ng’om mi Jukaldayo, man abidwoke ni uvuru mi nja.

¹³ Man abikelo lembe para ceke wi ng’om maeno m’ang’olo i kume, en e gin ceke ma jukiewo i kitabu maeni, ma Yeremia ewo kum thek ceke.

¹⁴ Kum thek dupa man ubimo ma dongo bidwokogi ni ng’eca, en e gin; man abiculo igi calku tic migi, man calku tic m’i cing’gi.

Kikombe mi Kwinyo pi Thek

¹⁵ Kum Yehova, Mungu mir Israel, uwacu ira kumae: Gam kikombe maeni mi pigulok mi kwinyo kud i cinga, man iketh thek ceke, m’aori i bang’gi, gimadhe.

¹⁶ E gibimadhu, man gibiwiri kun ku kun, man gibidoko abelu, kum palamularu m’abioro i kindgi.

¹⁷ Alund agamu kikombe kud i cing’ Yehova, man aketho thek ceke madhu, ma Yehova ora i bang’gi:

¹⁸ en e, Yerusalem, man adhura mi Yuda, ku ju m’ubimone, man judongomawijone, kara udwokgi ni uvuru, ni wang’uic, ni cac, man ni kwong’, calu ebedo i ceng’ maeni;

¹⁹ Farao m’ubimo mi Misiri, ku jutic pare, man judongomawijo pare, ku dhanu pare ceke

²⁰ man dhanu m’ajeba ceke, ku ju m’ubimo ceke mi ng’om Uz, ku ju m’ubimo ceke m’i ng’om mi Julilisti, kud Ackelon, man Gaza, ku Ekron, man dong’ dhanu mir Acdod;

²¹ kud Edom, man Moab, ku nyithindho mir Amon;

²² man ju m’ubimo ceke mi Turo, ku ju m’ubimo ceke mi Sidon, man ju m’ubimo mi cula ma ni loka nam;

²³ ku Dedan, man Tema, man Buz, ku dhanu ceke ma junyaru dhu yuk wigi;

²⁴ ku ju m’ubimo ceke mir Arabia, ku ju m’ubimo ceke mi dhanu m’ujebre m’ubedo i langa;

²⁵ ku ju m’ubimo ceke mi Zimri, man ju m’ubimo ceke mir Elam, ku ju m’ubimo ceke mi jumedi;

²⁶ man ju m’ubimo ceke ma yor ariwa ma malu, ma bor ku ma ceng’ni, acel karacelo ku wagi; man ker ceke m’i ng’om, ma gini wi wang’ ng’om: man ubimo mi Cecak bimadhu yo ng’eigi.

²⁷ E ibiwacu igi kumae, Yehova mir udul, Mungu mir Israel, uwacu kumae: Wumadhi, man wumer, man wung’ok de, e wupodhi, man kud wuai kendo, kum palamularu m’abioro i kindwu.

²⁸ Man ebibedo, tek gikwero gamu kopo kud i cingi ya gimadhi, ibilund wacu igi kumae, Yehova mir udul uwacu kumae: Wubimadhu andha.

²⁹ Kum, nen, atheko timo lem ma rac i adhura m’ulwongre ku nyinga; man maku wubed ndhu ma masendi mbe i kumwu? Wubibedo ngo ma masendi mbe; kum abilwong’o palamularu wi dhanu ceke m’ubedo i ng’om, Yehova mir udul uwacu.

³⁰ Ka kumeno cu lembe maeni ceke i kumgi, man iwac igi kumae, Yehova birundo ku malu, man ebiwodho dwande ku i kabedo pare ma leng’; ebirundo ma tek kum kwac pare; ebikok, calu ju m’unyono nyingulok, kum dhanu ceke m’ubedo wi ng’om.

³¹ Badwal bibino cil i kajik mi ng’om; kum Yehova bedo ku piem ku thek; ebimondo i pokolembe ku weg kum ceke: pi judubo, ebimiogi ni palamularu, Yehova wacu.

³² Yehova mir udul uwacu kumae, Nen, lem ma rac biai ba thek tundo ba thek, man wavuvu ma dit bituk kud i ng’et ng’om ma wi tung’.

³³ Man i ceng’ maeca ju ma junego pa Yehova bibedo nuti gambre i kajik mi ng’om acel cil kum kajik mi ng’om mucelo: jubiywagugi ngo, kadok acoka de, kadi ayika de; gibibedo ni weyo i wang’ ng’om.

³⁴ Wugoi nduru, wu jukwac, man wuywaki; wuvukru de ku vuru, wu jutego mir udul rombe; kum nindo mi nek mu man lal mu tundo, man wubipodho calu combo ma ber.

³⁵ E yoj ng’wec bibedo umbe ni jukwac, kadi both mi jutego mir udul rombe de bibedo mbe.

³⁶ Dwal mi ywak mi jukwac, man goyonduru mi jutego mir udul rombe! kum Yehova dwoko kakwae migi ni uvuru.

³⁷ Man juketho kwac ma museme ling’ ni kum kwinyo ma lake tek pa Yehova.

³⁸ Eweko kapondo pare, calu umvor; kum ng’om migi doko ni wang’uic, ni kum kwinyo mi palamularu m’ubesendo, man kum ng’ecwiny pare ma lake tek.