Yeremia 23 - The Holy Bible In Alur (Lur) Revised Orthography

Dwogo mi Dong’ Dhanu M’udong’

¹ Can wi jukwac m’unyotho man m’ulalu rombe mi kakwae para mire! Yehova wacu.

² Ka kumeno Yehova, Mungu mir Israel, uwacu kumae, kum jukwac m’ukaku dhanu para ku cam: Wulalu udul rombe para, man wuriemogi woko, man wuliewogi ngo; nen, abiliewo lem ma rac mi giratima mu i kumwu, Yehova wacu.

³ Man abicoko dong udul rombe para kud i ng’om ceke m’ariemogi i ie, man abikelogi kendo ba kwac migi; e gibinyai gibimedri de.

⁴ Man abiketho jukwac i wigi, ma bikakugi ku cam; e lworo binegogi kendo ngo, kadi cwinygi de bing’abre ngo, kadok moko de mbe ma bijwik, Yehova wacu.

⁵ Nen, nindo bino, Yehova wacu, nia abiting’o Jang ma pwe ni Daudi, man ebicamu ker calu ubimo man ebitimo ku rieko, e ebitimo pokolembe ku bedopwe i ng’om.

⁶ I nindo pare Yuda biboth, man Israel bibedo museme; man maeni nyinge ma jubilwcng’e ko: Yehova ma bedopwe mwa.

⁷ Ka kumeno, nen, ceng’ ubino, Yehova wacu, ma gibiwacu ie kendo ngo kumae, Calu Yehova, m’uwodho nyithindho mir Israel kud i Misiri, ubedo kwo;

⁸ ento, Calu Yehova, m’uwodho man m’utelo kodhi mi ot mir Israel kud i ng’om ma yor ariwa ma malu, man kud i ng’om ceke m’ariemogi i ie, ubedo kwo. E gibibedo i ng’om migi ma dhe.

Kwer ma Jukwevo Ko Jubila mi Ndra

⁹ Pi jubila: adundena tur yor i ia, cogona ceke yengre; an a calu ng’atu ma mer ku kong’o, man calu ng’atu ma pigulok usage, kum Yehova, man kum lembe pare ma leng’.

¹⁰ Kum ng’om upong’ ku weg dubriswa; kum ng’om uywak kum kwong’o kwong’; kakwae mi langa tal. Man woth migi rany, man tego migi en e atira ngo;

¹¹ kum jabila ku jalam gicido; eyo, anwang’u dubo migi i ot para, Yehova wacu.

¹² Kum kumeno yo migi bibedo igi calu ka ma Loth i mudho: jubilekogi, e gibipodho i ie; kum abikelo lem ma rac i wigi, en e rundi mi lieu migi, Yehova wacu.

¹³ Man aneno kasegu i jubila mi Samaria; giewo lembe ni kum Bal, e giroco dhanu para mir Israel,

¹⁴ Aneno gin ma judagu i jubila mi Yerusalem bende; gidubri swa, man giwotho ku ndra; man gimio tego ni cing’ jutim rac, ketho ng’atu moko mbe m’udwogo kud i dubo pare: kagi ceke gidoko ira calu Sodom, man ju m’ubedo i ie de calu Gomora,

¹⁵ Ka kumeno Yehova mir udul uwacu kumae pi jubila: Nen, abikakugi ku yendadra, man abiketho gimadhu pigulecu; kum gin ma ayi Mungu mbe i kume ai ba jubila mi Yerusalem ucidho i ng’om ceke.

¹⁶ Yehova mir udul uwacu kumae, Kud wuwinj lembe mi jubila m’uewo iwu: giponjowu ku gin ma ie nanu; giyero ginmawokiwang’ mir adundegi gigi, man kud i dhu Yehova ngo.

¹⁷ Giwacu thiri’thiri’ni ju m’ucaya kumae, Yehova wacu kumae, Wubibedo ku kwiocwiny; man giwacu kumae ni dhanu ceke kubang’gi kubang’gi m’uwotho i udhuko mir adundene gire, Lem moko ma rac biwok i kumwu ngo.

¹⁸ Kum ng’a ma cungo i lembapora pa Yehova, ma nia eng’ei man ewinj lembe pare de? ng’a ma paru pi lembe para, ma winje de?

¹⁹ Nen, wavuvu pa Yehova, en e kwinyo pare, uwok woko, eyo, wavuvu mir atido: ebing’eny i wi judubo.

²⁰ Ng’ecwiny pa Yehova bidwogo ngo, maram etimo ko, man maram edaru ko lembakece mir adundene: i nindo ma cen wubing’eyo there cu.

²¹ Aoro jubila maeni ngo, ento giringo: ayero igi ngo, ento giewo.

²² Ento tek gicungo i lembapora para, kuno di giketho dhanu para winjo lembe para, man kuno di gilokogi kud i yo migi ma rac, man kud i dubo mi giratima migi.

²³ An a Mungu ma ceng’ni, Yehova wacu, man Mungu ma bor ungo?

²⁴ Ng’atu moko copo pondo i kapondo moko ma nia anene ngo? Yehova wacu. Apong’o polo ku ng’om ungo? Yehova wacu.

²⁵ Awinjo gin ma jubila wacu, ma giewo ko ndra ku nyinga, ma giwacu kumae, Aleko lek, aleko lek.

²⁶ Maeni bibedo i adunde jubila ma ewo ndra rokani, en e jubila mir abombi mir adundegi gigi?

²⁷ ma giparu ya giketh widhanu para wil kum nyinga ni kum lek migi ma giyero ku ba dhanu ku ba dhanu ng’atuman ni wadi, calu wi weggi wil kum nyinga pi Bal.

²⁸ Jabila m’ubedo ku lek, wek eyer lekne; man ng’atu m’ubedo ku lembe para, wek eyer lembe para kakare, Soka en e ang’o ka jupore ku nganu? Yehova wacu.

²⁹ Lembe para calu mac ungo? Yehova wacu; man calu nyondro ma turo cana nziki nziki ngo?

³⁰ Ka kumeno, nen, agoyo kora kum jubila, Yehova wacu, ma gikwalu lembe para kubang’gi kubang’gi ng’atuman ba wadi.

³¹ Nen, agoyo kora kum jubila, Yehova wacu, ma gitimo ku lebgi, man giwacu kumae, Ewacu.

³² Nen, agoyo kora kum ju ma ewo lek mi ndra, Yehova wacu, man ma giyero lekne, man ma giketho dhanu para kier ku ndra migi, man ku kulula migi mananu: ento aorogi ngo, kadi ang’olo igi de ngo; kadi kulokagi de ki mbe ni dhanu maeni, Yehova wacu.

³³ Man kinde ma dhanu maeni, kadi jabila, kadi jalam, bipenji, biwacu kumae, Ewolembe pa Yehova en e ang’o? ibilund wacu igi kumae, Ewolembe ma nedil Abibayuwu cen, Yehova wacu.

³⁴ Man pi jabila, ku jalam, man dhanu, ma biwacu kumae, Ewolembe pa Yehova, abisendo ng’atu maeno ku ot pare de.

³⁵ Wubiwacu kumae ku ba dhanu ku ba dhanu ng’atuman ni wadi, man ku ba dhanu ku ba dhanu ng’atuman ni umin mire, Yehova loko lembang’o? man kumae, Yehova yero ang’o?

³⁶ E wubiwacu pi ewolembe pa Yehova kendo ngo: kum ku ba dhanu ku ba dhanu ng’atuman lembe pare ma dbe bibedo ewolembe pare; kum wuloko iembo pa Mungu ma kwo, pa Yehova mir udul ma Mungu mwa.

³⁷ Ibiwacu kumae ni jabila, Yehova loko lembang’o iri? man kumae, Yehova yero ang’o?

³⁸ Ento tek wuwacu kumae, Lembaewa pa Yehova; kum kumeno Yehova wacu kumae: Kum wuwacu lembe maeni kumae, Lembaewa pa Yehova, man aoro i beng’wu, awacu kumae, Kud wuwac kumae, Lembaewa pa Yehova;

³⁹ ka kumeno, nen, wia biwil ma gwei i kumwu, e abibayuwu cen, kjd adhura m’amio iwu man ni kw’aruw’u, cen kud i vuta:

⁴⁰ man abikelo cac mi nja i wiwu, man lewic ma thum ungo, ma wijo biwil pire ngo.