Yeremia 22 - The Holy Bible In Alur (Lur) Revised Orthography

¹ Yehova wacu kumae: Lor piny ba ot p’ubimo mi Yuda, man iyer lembe maeni kuca,

² e iwac kumae, Winj lembe pa Yehova, E ubimo mi Yuda, m’ubedo wi komker pa Daudi, in, ku jutic peri, ku dhanu peri ma mondo ku dhugang’ maeni.

³ Yehova wacu kumae: Wutim pokolembe ku bedopwe, man wubodh ng’atu ma juyaku kud i cing’ jasend: man kud wutim rac, kud wutim rop, kum umondo, kadi kum kic, kadi kum dhaku ma cware tho; kadi kud wucwir rimo m’umbe dubo kakeni.

⁴ Kum tek wutimo gin maeni andha, e ju m’ubimo m’ubedo wi komker pa Daudi, m’uwotho i magali man wi riuni, en, ku jutic pare, man dhanu pare, gibilund mondo ku dhugang’ mi ot maeni.

⁵ Ento tek wubiwinjo lembe maeni ngo, akwongra kuda gira, Yehova wacu, nia ot maeni bidoko ni uvuru.

⁶ Kum Yehova wacu kumae, pi ot p’ubimo mi Yuda: In i Gilead ira, man wie mi Lebanon; ento abidwoki ni langa andha, man adhura ma jubedo i ie ngo.

⁷ Man abiyiko junyoth i kumi, kubang’gi kubang’gi ng’atuman ku jamtho pare; man gibing’olo musonge peri m’ifoyo, e gibibayugi i mac.

⁸ Man thek dupa bikadhu ku kum adhura maeni, e gibiwacu kubang’gi kubang’gi ng’atuman ni wadi kumae, Pirang’o Yehova timo kumeni kum adhura ma dit maeni?

⁹ Gibilund loko lembe kumae, Kum giweko lembariba pa Yehova Mungu migi, man girwo ni mungu mange, gitimo igi de.

¹⁰ Kud wuywak pi ng’atu m’utho, kadi kud wuywage; ento wuywak hai pi ng’atu m’ucidho cen; kum ebidwogo kendo ngo, kadi ebineno ng’om ma thugi de ngo.

¹¹ Kum Yehova wacu kumae pi Calum ma wod Yosia, m’ubimo mi Yuda, m’ucamu ker ka Yosia ma won, man m’uwok woko ku kakeni: Ebidwogo keni kendo ngo;

¹² ento i ka ma gipeye i ie ni ng’eca, ebitho kuca, man ebineno ng’om maeni kendo ngo.

¹³ Can wi ng’atu m’ugomo ot pare ku gondri, man kusika pare ku lembe ma pwe ngo; ma yio wagi timo ire tic m’umbe sukuliane, man ma mio ire sukulia pare ngo;

¹⁴ ma wacu kumae, Abigomo ira ot ma lac ku kusika ma lac, man ma tong’o ire wang’ot; man juumo wie ku musonge, man jumwone ku kitpiny ma kwar ngbo.

¹⁵ Ibicamu ker, kum iponjo segri ku musonge? Wuru camu emadhu de ngo, man etimo pokolembe ku bedopwe ngo? elund ebedo ber ire.

¹⁶ Epoko lembe mi jucan ku jucanpiny: elund ebedo ber. En e kara jung’eya ngo? Yehova wacu.

¹⁷ Ento weng’i kud adundeni bedo kum gin mange ngo ndhu mi ketho cwinyi hai kum piny, man mi cwiro rimo m’umbe dubo, man mi masendi, ku mi rop, nitime.

¹⁸ Ka kumeno Yehova wacu kumae pi Yehoiakim ma wod Yosia, m’ubimo mi Yuda: gibiywage ngo, ma giwac kumae, A umira! kadi, A nyamego! Gibiywage ngo, ma giwac ko kumae, A rwoth! kadi, A dwong’ pare!

¹⁹ Jubiyike ku yik mi kana, ma juywaye jubaye de ng’ei gang’kidi mi Yerusalem.

²⁰ Idh malu ba Lebanon, man ikok; man iting’ dwendi i Bacan, man ikok ku i Abarim; kum junyotho jumer peri ceke.

²¹ Ayero iri i mierolembe peri; ento iwacu kumae, Abiwinjo ngo. Maeni kura peri ugambre i aradu peri, nia iworo dwanda ngo.

²² Yamu bikaku jukwac peri ceke ku cam, man jumer peri bicidho i ng’eca: andha lewic bilund meki man cwinyi bing’abre andha kum dubo peri ceke.

²³ E ng’atu m’ubedo i Lebanon, m’itimo udi peri wi musonge, ibibedo ma maku ngisi neg jo i kumi dit kinde ma remokum uwok i kumi, remokum ma calu pa dhaku m’unyol mire!

²⁴ Calu abedo kwo, Yehova wacu kadok Konia ma wod Yehoiakim m’ubimo mi Yuda en e lagith mir ayi i cinga ma yor acwic, ento kuno di akebi ku kuno;

²⁵ man abimii i cing’ ju m’uyenyo kwo peri, man i ciiig’ ju ma lworo negi i kumgi, en e i cing’ Nebukadrezar m’ubimo mi Babeli man i cing’ Jukaldayo.

²⁶ Man abibei woko, ku meru m’unyoli, i ng’om mange, ka ma junj’oli i ie ngo; e wubitho kuca.

²⁷ Epto ba ng’om ma ng’eyong’ec migi yenyo gidwog i ie, gibidwogo keca ngo.

²⁸ Ng’atu maeni ma Konia en e agulu m’ung’eny ma jucayu? en e agulu ma ng’atu moko mbe ma anyong’a nege i kume? pirang’o jubayugi woko, en ku kodhine, man jubayugi i ng’om ma ging’eyo ngo?

²⁹ E ng’om, ng’om, ng’om winj lembe pa Yehova.

³⁰ Yehova wacu kumae, Wugor ng’atu maeni m’umbe nyathin, ng’atu ma lembe bibedo miero ire ngo i nindo pare; kum ng’atu moko mbe ma nyakware ma bibedo ku mierolembe kendo, ma bibedo wi komker pa Daudi, man ma bibimo i Yuda.