Yeremia 2 - The Holy Bible In Alur (Lur) Revised Orthography

Yehova ii Ku Israel M’ukier

¹ E lembe pa Yehova bino i bang’a, m’uwacu kumae,

² Cidhi, man ikok i ith Yerusalem, iwac kumae, Yehova wacu kumae, Apoi piri kum bero mir aradu peri, kum mer mi gambri peri; maram ilubo ko toka i langa, i ng’om ma jucoyo ngo.

³ Israel ubedo ni leng’ ni Yehova, mwoka mi nyai pare: ceke m’ucame jubinwang’u nia lembe ni i wigi; lem ma rac bipodho i wigi, Yehova wacu.

⁴ Wuwini lembe pa Yehova, E ot pa Yakobo, ku wat ceke mi ot mir Israel:

⁵ Yehova wacu kumae, Gondri ang’o ma kwaruwu mvang’u i ia, m’uketho gicidho bor i kuma, man m’uketho giwotho tok gin ma ie nanu, m’uketho gidoko ma kitgi mbe de?

⁶ Kadi giwacu kumae ngo, Yehova ni kani m’uwodhowa kud i ng’om Misiri, m’utelo wiwa kud i langa, kud i ng’omngele man mi vur, kud i ng’om mi ndru man mi tipo mi tho, kud i ng’om ma ng’atu moko kadhu kud i ie ngo, man ka ma ng’atu moko mbe m’ubedo i ie?

⁷ Man akelowu i ng’om ma cam ciit i ie, kara wucam nyinge ku gin ma berne; ento kinde ma wumondo, wucido ng’om para, man wudwoko aba para ni ginmajudagu.

⁸ Julam upenjo ngo kumae, Yehova ni kaai? e ju ma timo cik de ging’eya ngo: jubim bende gidubo ira, man jubila giewo ni kum Bal, man gilubo tok gin ma kulokane mbe.

⁹ Kum kumeno abikoii kudu, Yehova wacu, man abikoii ku nyithindho mi nyithindho mu.

¹⁰ Kum wukadh lokaca ba cula mi Kitim, man wunen; man wuor ba Kedar, e wupid cu; man wunen tek wadi ma kumeni bedo nuti.

¹¹ Thek moko loko mungu pare, ma fodi mungu ngo? ento dhanu para giloko dworrg’’ migi ku gin ma kulokane mbe.

¹² Iwu wang’ lii, E wu polo, kum maeni, man lworo negwu hai, wubed kendwu toli, Yehova wacu.

¹³ Kum dhanu para timo lem ma rac ario: giweka, ma kulo mi pi mi kwo, man gitong’o igi kulo m’atong’a, kulo m’atong’a m’ung’eny, ma pi copo bedo i ie ngo.

¹⁴ Israel en e jatici? en e ng’eca m’anyola? nedi edoko ni amaci?

¹⁵ Nyithindh umvor girundo i wie, man giwodho dwandgi; e gidwoko ng’om pare ni uvuru: adhura pare wang’, ma dhanu mbe i ie.

¹⁶ Nyithindho bende mi Memfis ku Tapanhis gituro jamkermiwic m’i wii.

¹⁷ Ilimo maeni iri giri ngo, kum iweko Yehova Mungu peri, kinde m’etelo wii i yo?

¹⁸ Kawono ibedo kud ang’o m’ibitimo i yo mi Misiri, kara imadh pi mi Nili? kadi ibedo kud ang’o m’ibitimo i yo mir Ascur kara imadh pi mi Kulo?

¹⁹ Dubo peri giri biponji, man corocen peri bijuki: ka kumeno ing’ei man inen nia en e gin ma rac man ma kec, nia iweko Yehova Mungu peri, man nia lworo para mbe i ii, Rwoth, Yehova mir udul, uwacu.

²⁰ Kum ugambre con aturo mberembere peri, man acodo twic peri; e iwacu kumae, Abitimo ngo; kum igung’ giri wi ungulu gudi ma wiu kubang’e kubang’e man the yen m’udinyo kubang’e kubang’e, m’ibetimo ko asara.

²¹ Ento apidhi ni ulok ma ber, ndhu kodhi ma cu: ka kumeno ilokri ni jambulok ma tung’ ma rac ira nedi?

²² Kum kadok ijombri ku pi ma jutimo ko sabuni, man igamu iri sabuni dit, ento kier peri kieure i wang’a, Rwoth Yehova wacu.

²³ Icopo wacu nenedi kumae, Acido ngo, acidho tok Balim ungo? nen yo peri i poga, ng’ei gin m’itimo, in i kana m’aradu ma ringo pio m’ubewotho i yo pare;

²⁴ in i kana m’i thim m’ing’io ku langa, m’uyuyo yamu i yeny m’eyenyo; ng’a ma copo loke cen i yo pare? dhanu ceke m’uyenye gibiol gigi ngo; gibinwang’e i dwi pare.

²⁵ Gwok tiendi kud ubed ma wara umbe, ku dwendi de ni rieu. Ento iwacu kumae, En e mananu; ngo, kum amaru juwirok, man abilubo tokgi.

²⁶ Calu lewic unego jakwo kinde ma jurube, e lewic unego ot mir Israel kumeca; gin, ju m’ubimo migi, ku judongomawijo migi, ku julam migi, ku jubila migi;

²⁷ m’uwacu ni dundyen kumae, In i vwa; man ni kidi kumae, Inyola: kum giloko ng’eigi ira, wang’gi re ngo; ento i nindo mi can migi gibiwacu kumae, Ai, man ibodhwa.

²⁸ Ento mungu peri m’itimo ire ni kani? wek giai, tek gicopo bodhi i nindo mi can peri; kum wel mungu peri calku wel mir adhura peri, E Yuda.

²⁹ Wubi-ii kuda pirang’o? kewu ceke wudubo ira, Yehova wacu.

³⁰ Agoyo nyithindho mu kwe; gijolo ponji ngo: palamularu mu ma dhe daru jubila mu, calu umvor m’ubenyotho anyotha.

³¹ E dhanum’utuk, wunen lembe pa Yehova. Abedo ni langa ni Israeli? kadi ni ng’om mi mudho ma bi? dhanu para wacu kumae pirang’o, Wagonjra; wabibino i beng’i kendo ngo?

³² Nyaku ma sumba wie copo wil kum jambruko pare, kadi mugole de kum kendi pare? ento dhanu para wigi wil pira ma wel nindone mbe.

³³ Iyiko yo peri nedi kara iyeny mer! ka kumeno cil mon ma judubo de iponjo ku yo peri.

³⁴ Junwang’u rimo mi ng’eyong’ec mi jucan m’umbe dubo bende i dhu kendi peri: inwang’ugi ngo ma giberwombo piny; ento en e kum gin maeni ceke.

³⁵ Ento iwacu kumae, Abedo ma lembe mbe i wia; andha ng’ecwiny pare lokre cen kud i kuma. Nen, abimondo i pokolembe kudi, kum iwacu kumae, Adubo ngo.

³⁶ Iwotho kun ku kun kumeni nedi kara ilok yo peri? lewic binegi kum Misiri bende, calu lewic unegi kum Ascur.

³⁷ Ku kuca bende ibiwok woko, ku cingi i wii: kum Yehova kwero ju m’igeno, man lembe peri bibedo miero kugi ngo.