Yeremia 15 - The Holy Bible In Alur (Lur) Revised Orthography

Kwinyo pa Yehova M’ulokre Ngo kum Yuda

¹ Yehova lund uwacu ira kumae, Kadok Musa giku Samwil gicungo i wang’a, ento kuno di pidoia bedo yo ba dhanu maeni ngo: baigi woko kud i wang’a, man wek gici cen.

² Man ebitimbre, kinde ma giwacu iri kumae, Waci cen kani? e ibilund wacu igi kumae, Yehova wacu kumae: Wadi ju ma mi tho, gici ba tho; man wadi ju ma mi palamularu, gici ba palamularu; man wadi ju ma mi ndru, gici ba ndru; man wadi ju ma mi ng’eca, gici ba ng’eca.

³ Man abiketho kwond piny ang’wen i wigi, Yehova wacu: palamularu mi nek, man gwogi mi yeco, man winyo ma kor polo, ku yedi m’i ng’om, mi camu man mi nyotho.

⁴ Man abiketho juthorogi kun ku kun i kind ker ceke m’i ng’om, kum Manase, ma wod Hezekia, m’ubimo mi Yuda, kum gin m’etimo i Yerusalem.

⁵ Kum ng’a ma kisa binege i kumi, E Yerusalemi? kadi ng’a ma biywegi? kadi ng’a ma bilokre cen kara epenj pi bedober peri?

⁶ Ikwera, Yehova wacu, icoro cen: ka kumeno arieyo cinga i kumi, man anyothi; aol ku lokocwiny.

⁷ Man apiedhogi kud udheru i dhugang’ m’i ng’om; ayaku nyithindho migi, anyotho dhanu para; gilokri ngo kud i yo migi.

⁸ Mon migi ma coggi tho ginyai ira ma sagu kwio m’i nam; akelo janyoth i wigi kum meg awobi i dieceng’; aketho ndiba ku ndiri podho i wie pio.

⁹ Dhaku m’unyol abiro voc; cwinye mwony; ceng’ pare mwony kinde ma piny fodi ni dieceng’; lewic umake man cwinye ng’abre: e donge m’udong’ abimio ni palamularu i wang’ judegi migi, Yehova wacu.

¹⁰ Can i wia, ma, kum inyola ni dhanu mi piem man dhanu mi i aia ku ng’om dho! amio banja ngo mi kuloka, kadok ira de dhanu mio banja mi kuloka ngo; ento gikwong’a kagi ceke kubang’gi kubang’gi.

¹¹ Yehova wacu kumae, Andha abimio tego iri mi bero: andha abiketho jadegini paku dhoge iri i nindo ma rac man i nindo mi masendi.

¹² Ng’atu moko copo turo nyunyu, en e nyunyu m’uai yor ariwa ma malu, man mola?

¹³ Piny peri ku piny m’akana peri abimio ni ayeki m’umbe wel pinje, man maeno kum dubo peri ceke, cil i kieu peri ceke.

¹⁴ Man abiketho gikadhu ku judegini i ng’om m’ing’eyo ngo; kum mac ucwinjre i ng’ecwiny para, ma biwang’ i wii.

Yehova Mio Kwiocwiny ni Yeremia

¹⁵ E Yehova, ing’eyo; poi pira, man iliewa, man icul kwor ira kum jusendna; kud ikaba cen i twiocwiny peri: ng’ei nia anwang’u cac piri.

¹⁶ Junwang’u lembe peri, man acamugi; e lembe peri bedo ni mutoro man ni anyong’a mir adundena: kum julwong’a ku nyingi, E Yehova, Mungu mir udul.

¹⁷ Abedo ngo i cokri mi ju ma timo mutoro, kadi anyong’a de nega ngo; abedo kenda kum cingi; kum ipong’a ku ng’ecwiny.

¹⁸ Nedi remokum para bedo thiri thiri, man lero para cangu ngo, m’ekwero cangu? ibibedo ira andha calu kulo mir abombi, calu pi mandha ngo?

¹⁹ Ka kumeno Yehova wacu kumae, Tek idwogo, abilund keli kendo, kara icung i wang’a; man tek ikabu piny ma pire tek kud i piny ma ng’ic, ibibedo calu dhoga: gibidwogo i beng’i, ento ibidwogo i bang’gi ngo.

²⁰ Man abidwoki ni gang’ mi mola ma judwoko tek ni dhanu maeni; e gibikiedo i kumi, ento gibisegi ngo; kum wanuti wakudi kara abodhi, man kara agonyi, Yehova wacu.

²¹ Man abigonyi kud i cing’ judubo, abiweri de kud i cing’ weg ndiri.