Yeremia 12 - The Holy Bible In Alur (Lur) Revised Orthography

Ywak pa Yeremia man Dwokolembe pa Mungu

¹ E Yehova, in i pwe kinde ma waii wakudi; ento kuno di waporo lembe kudi; pirang’o yo mi judubo bedo miero? pirang’o dhanu ceke m’utimo kud abombi dit gibedo yo?

² Ipidhogi, eyo, giguro ulaggi; gitwi, eyo, gicego nying’gi; in i ceng’ni i dhoggi, man i bor kud adundegi.

³ Ento in, E Yehova, ing’eya; inena, man iponjo adundena yor i beng’i: telgi woko calu rombe mi nek, man iyikgi mi ceng’ mi nek.

⁴ Ng’om biywak rokani, man uboko m’i ng’om dho bineri? kum dubo mi ju m’ubedo i ie, yedi thum, ku winyo de; kum giwacu kumae, Ebineno kajik mwa ngo.

⁵ Tek iringo ku dhanu ma wotho ku tielo, man gioli, ka kumeno icopo ii ku riuni nenedi? man kadok ibedo museme i ng’om mi kwiocwiny, ento ibitimbri nedi i tingri mi Yordani?

⁶ Kum cil utumeru, ku ot pa wuru, cil gin gitimo kud abombi i kumi; cil gin giywak ma tek i toki: kud iyigi, kadok giyer lem ma mit i beng’i.

⁷ Akuno ot para, abayu aba para amio jamer mi ng’eyong’ec para i cing’ judegine.

⁸ Aba para doko ira calu umvor m’i luli: ewodho dwande i kuma; ka kumeno adage.

⁹ Aba para bedo ira calu winyo ma cukucuku mir amaci? winyo mir amaci gitieke gbur kud ali? wucidhi, wucok yedi ceke m’i thim, wukelgi kara gicam.

¹⁰ Jukwac dupa ginyotho podho mir ulok para, ginyono makapiny para the tielo, gidwoko makapiny para ma ber ni langa mir uvuru.

¹¹ Gidwoke ni uvuru; eywak i bang’a, m’ebedo kende; judwoko ng’om dho ni uvuru, kum ng’atu moko mbe m’uketho adundene i kume.

¹² Junyoth ubino wi ka m’utingre ceke ma lelele i langa; kum palamularu pa Yehova nego ugambre i kajik mi ng’om acel cil kum kajik mi ng’om mucelo: weg kum moko mbe m’ubedo ku kwiocwiny.

¹³ Gicoyo nganu, man gikayu ukudho; ginyayu remokum i kumgi gigi, man kulokane mbe: man lewic binegowu kum nyingwu, kum ng’ecwiny ma lake tek pa Yehova.

¹⁴ Yehova wacu kum wat para ceke ma rac, m’umulo aba m’aketho dhanu para Israel ugam ni aba kumae: Nen, abifudhogi woko kud i ng’om migi, man abifudho ot mi Yuda kud i kindgi.

¹⁵ Man ebitimbre, yo ng’ei fudhogi m’afudhogi woko, abidwogo man ngisi binega i kumgi; e abikelogi kendo, ku ba dhanu ku ba dhanu ng’atuman bang’ aba pare, man ku ba dhanu ku ba dhanu n’gatuman ba ng’om pare.

¹⁶ Man ebitimbre, tek gibiponjo ng’eyo yo mi dhanu para cu, ya gikwong’ kwong’ ku nyinga kumae, Calu Yehova bedo kwo; cil calu giponjo dhanu para ya gikwong’ kwong’ ku Bal, e gibilund gombri i kind dhanu para.

¹⁷ Ento tek gibiwinjo ngo, e abilund fudho thek maeni woko, m’abefudhe woko m’abenyothe de, Yehova wacu.