Yeremia 11 - The Holy Bible In Alur (Lur) Revised Orthography

Lembariba ma Juturo

¹ Lembe m’uai ba Yehova ubino ba Yeremia, m’uwacu kumae,

² Wuwinj lembe mi lembariba maeni, man wuyer ni dhanu mi Yuda, man ni ju m’ubedo i Yerusalem;

³ man iwac igi kumae, Yehova, Mungu mir Israel, uwacu kumae: Kwong’ ubed wi ng’atu m’uwinjo lembe mi lembariba maeni ngo,

⁴ m’ang’olo ni kwaruwu i ceng’ m’awodhogi ie woko kud i ng’om Misiri, ku i uka mi nyunyu, m’awacu kumae, Wuwor dwanda, man wutimgi, calku gin ceke m’ang’olo iwu: kum kumeno wubibedo dhanu para, man abibedo Mungu mu;

⁵ kara aketh kwong’ m’akwong’o ni kwaruwu cungi, kara ami igi ng’om ma molo cak ku kic, calu i ceng’ ma tin. Alund aloko lembe, man awacu kumae, Amen, E Yehova.

⁶ E Yehova wacu ira kumae, Yer lembe maeni ceke i adhura mi Yuda, man, i gengi mi Yerusalem, ma wuwac ko kumae, Wuwinj lembe mi lembariba maeni, man wutimgi.

⁷ Kum anyutho lembe dit ni kwaruwu i ceng’ m’awodhogi ie woko kud i ng’om Misiri, cil i ceng’ ma tin, m’aai pir man anyutho, awacu kumae, Wuwor dwanda.

⁸ Ento giworo ngo, kadi giciko ithgi ngo, ento giwotho kubang’gi kubang’gi i udhuko mir adundegi ma rac: ka kumeno akelo lembe ceke mi lembariba maeni i wigi, m’ang’olo igi ya gitim, ento gitimogi ngo.

⁹ E Yehova wacu ira kumae, Lembariba mi rop, unwangre i kind dhanu mi Yuda, man i kind ju m’ubedo i Yerusalem.

¹⁰ Gilokri cen ba kier pa kwarugi, m’ukwero winjo lembe para; man gilubo tok mungu mange kara gitim igi: ot mir Israel man ot mi Yuda gituro lembariba para m’atimo ku kwarugi.

¹¹ Ka kumeno Yehova wacu kumae, Nen, abikelo lem ma rac i wigi, ma gibicopo both i ie ngo; e gibiywak i bang’a, ento abiwinjogi ngo.

¹² Adhura mi Yuda man ju m’ubedo i Yerusalem bilund cidho man gibiywak ba mungu ma githiero udok ma ng’wice ng’ar igi: ento gibibodhogi ki ngo i nindo mi can migi.

¹³ Kum calku wel mir adhura peri mungu peri de kumeno, E Yuda; man calku wel mi gengi mi Yerusalem wuketho pemblam malu ni gin mi lewic, en e pemblam ma kara juwang’ udok ma ng’wice ng’ar ni Bal i wie.

¹⁴ Ka kumeno kud irwo pi dhanu maeni, kadi kud iting’ ywak kadi rwo pigi; kum abiwinjogi ngo i nindo ma giywak i bang’a kum can migi.

¹⁵ Jamerna bedo kud ang’o m’etim i ot para kum etimo tarwang’ ku dupa, man ring’kum ma leng’ ukadhu kud i beng’i? kinde m’itimo lem ma rac, anyong’a lund unegi.

¹⁶ Yehova lwong’o nyingi kumae, Yendulam ma ju ithe, m’e ber ku nyinge ma ber: ecwinyo mac i wie ku badwal mi yakni ma dit, man jange tur.

¹⁷ Kum Yehova mir udul, m’upidhi, eyero lem ma rac i kumi, kum dubo mi ot mir Israel man mi ot pa Yuda, ma gitimo igi gigi ku nyayu ng’ecwiny i ia kuthiero udok ma ng’wice ng’ar ni Bal.

Pido Lembe ma Rac kum Yeremia

¹⁸ E Yehova mio ira ng’eyong’ec pi maeni, man ang’eye: ilund inyutho ira giratima migi.

¹⁹ Ento abedo calu nyathi rombo ma mol ma jupeyo mi nek; man ang’eyo ngo nia gipido lembe i kuma, giwacu kumae, Wek wanyoth yen ku nyinge, man wek wang’ole woko kud i ng’om mi ju ma kwo, kara ku jupoi pi nyinge kendo.

²⁰ Ento, E Yehova mir udul, m’ipoko lembe pwe, m’iponjo adunde ku pidoic, abineno culokwor peri i kumgi; kum anyutho iri lembe para.

²¹ Ka kumeno Yehova wacu kumae pi dhanu mir Anathoth, m’uyenyo kwo peri, m’uwacu kumae, Kud ieu lembe ku nying’ Yehova, imaru tho i cingwa;

²² ka kumeno Yehova mir udul uwacu kumae, Nen, abisendogi: awobi bitho ku palamularu; wotgi ku nyiggi bitho ku ndru;

²³ man dong’gi bidong’ ungo igi: kum abikelo lem ma rac wi dhanu mir Anathoth, en e rundi mi lieu migi.